MAKABAT 20 mil ang gidaghanon sa mga nakumpiskang mga butang nga bawal sud sa prisohan ang gipaligsan og pison Martes, Hunyo 19, sa Davao City Jail.
Sumala ni Bureau of Jail Management and Penology (BJMP) spokesperson Jail Inspector Edo Lobenia nga ang gidaghanon sa mga gidili nga butang sud sa prisohan maoy nakumpiska sa ilang regular nga gipahigayong Oplan Greyhound sa mga selda sa BJMP sa rehiyon sa Davao.
Gikan sa mga sigarilyo, cellphone, ug uban pang mga gidili nga butang ang dungan nga gipangdaot kagahapon ug gipakita sa publiko.
Si Lobenia nagpasalig nga pinaagi niini makapasalig pag-ayo ang publiko sa BJMP nga wala silay giila ug gipili sa pagpatuman sa balaod diin kung bawal kini sud sa prisohan, dili gayud kini kasulod ug ilang pagakumpiskahon.
Dugang sa aktibidad, gipahigayon sab ang surprise drug testing sa tanang personahe sa BJMP aron maseguro nga mitamod gayud sila sa balaod kung mapamatud-an nga nagnegatibo sila sa ilang mga resulta. (Jeepy P. Compio)