SECTIONS
Sunday July 22, 2018
SUPERBALITA DAVAO

Stockman sa botika sa Tagum, giluba

TAGUM CITY -- Anaa sa talandugon nga kahimtang ang usa ka stockman sa usa ka pharmacy human giayo'g dunggab og keychain knife sa lalaki nga iyang kabikil.

Ang insidente natigayon alas 4:30 sa hapon niadtong Martes, Hunyo 20, sa J.V. Ayala Avenue, Barangay Apokon.

Nailhan ang biktima nga si Bernardo Matas, 22, stockman sa Jalee Pharmacy sa Tagum City ug residente sa Brgy. Ilaboon Relocation, Kapalong, Davao del Norte samtang ang suspek giingong si Cresante Villafuerte.

Subay sa kapulisan sa Police Regional Office (PRO)-Davao Region nga dunay daang bikil ang duha diin si Villafuerte nakigkita sa biktima aron mahusay ang ilang dumot.

Sa panagkita sa duha, giingong kalit gidunggab sa suspek ang biktima sa makadaghang higayon gamit ang usa ka keychain knife hinungdan nga nakaangkon kini'g daghang samad.

Dihang na-monitor sa kapulisan ang hitabo, daling naharang ang suspek kinsa mosibat na unta sakay sa iyang itom nga Honda Wave 110 nga motorsiklo.

Sa kasamtangan, giandam na sa Tagum City Police Station ang ipasaka nga kaso batok sa suspek didto sa korte. (Jeepy P. Compio)


VIEW COMMENTS