NIPOSTI og daug ang tulo ka pambato sa Cagayan de Oro pag-abri sa ilang kampanya atol sa unang adlaw nga aksyon sa 19th Asean Age Group Chess Championships, diin giabri niadtong Martes didto sa Royal Mandaya Hotel sa Davao City.
Nibandera ang magsuong Ronald ug Ruelle Canino, parehas nagrepresentar sa RP Age Group Team, pagpangulo sa kadaogan sa Cagayan de Oro delegation human gipilde nila ang ilang kadaiyang kaatbang.
Gipilde sa magulang nga Canino nga si Ronald ang kapwa kababayan nga si Rogel Nino Panilagao sa unang round sa 16-under boys classical standard category.
Daug sab ang iyang igsuon ug two-time Asean age group gold medalist nga si Ruelle human giparot niya ang iyang dugay nga karibal nga si Daren dela Cruz sa first round sa 10-under girls classical standard.
Nidaug sab ang first-timer RP Age Group member nga si David Rey batok kang Emmanuel Sabado sa 12-under boys standard category.
Maagbat sa magulang nga Canino ang top seed ug Fide Master Alekhine Nouri, samtang pulos Vietnamese ang masangka nila Ruelle ug Ancheta.
Mag-agbat ni Ruelle si seed no. 5 Le Minh Thu sa 10U girls, samtang masulay ni Ancheta ang iyang asido kang seed no.1 ug Candidate Master Nguyen Quoc Hy.
Natablahan sab ang duha ka pambato nga sila Mary Joy Tan ug Charles Kent Gabing sa ilang kadaiyang kategoriya sa 16U girls ug 14U boys, sunodsunod.
Nataboan og pilde ang nabiling pambato nga sila Maria Theresa Lumancas (8U girls), Lorebina Carrasco II (14U girls), Clyde Saraos (14U boys), Euniel Capilitan (14U boys), Joel Hoy (12U boys), Chargeats Andres (10U boys) ug Lawrence Lawan (8U boys).