SECTIONS
Friday July 20, 2018
SUPERBALITA CAGAYAN DE ORO

Natulog nga driver sa sikad gidunggab-patay

NATULOG lamang ang usa ka sikad drayber sa dihang giduolan sa menor de edad ug gihansak-hansak ang dughan ginamit ang kutsilyo kagahapon sa kaadlawon, Hunyo 20, didto sa J.R Borja extension atbang sa Maria Reyna-Xavier University Hospital, siyudad sa Cagayan de Oro.

Naila ang namatay nga mao si Philip Jumarito, 50, ulitawo usa ka trisikad driver ug kasamtangang nanimuyo sa Barangay 31 ug lumulupyo sa Bohol samtang ang suspek ang nag-edad og 16 anyos.

Sa nahipos nga impormasiyon gikan sa kapolisan sa Police Station 2 (PS2) sa Cogon, gikabutyag nga natulog lamang ang biktima nga si Jumarito ug kalit nga giduolan sa suspek dayong gihansak-hansak ang dughan ug dali kining misibat human sa panghitabo.

Gibutyag sa tinugyanan sa Scene of the Crime Operatives (Soco) nga nakitang aduna'y duha ka mga samad dinunggaban sa iyang dughan diin posibleng hinungdan sa hinanali niini nga kamatayon apan kinahanglan nga ipa-ilalom kini sa otopsiya aron masuta ang tinuod nga hinungdan ilabi na kung pila gyud ka mga samad ang naangkon niini.

"Sa inisyal assessment natin, meron pong dalawang saksak sa kanang bahagi nang dibdib yung namatay. So far, yun pa lang ho ang nakita natin so mukhang yun lang nag tinamaan sa kanya," pahayag ni Dr. Christian Caballes sa Soco.

Sa pagkakaron, nadakpan na ang menor de edad nga niangkon midunggab patay.


VIEW COMMENTS