SECTIONS
Sunday July 22, 2018
SUPERBALITA CEBU

Ayaw og tambay sa dan: pulis

Sugod na. Ang mga pulis sa Cebu City Police Office (CCPO) nagpahigayon og information drive sa kadalanan sa Dakbayan sa Sugbo aron pahibaw-on ang publiko sa Oplan Tambay, nga nagdili sa mga tawo nga magsurosuroy ug mag-estambay sa kadalanan. Ilang gamiton ang ordinansa ug balaud sa pagpatuman niini. (Arnold Bustamante)

AYAW pagsuroysuroy ug pag-estambay sa karsada panahon sa kagabhion.

Mao kini ang pahimangno sa Cebu City Police Office (CCPO) samtang sila nagpahimangno sa ilang paglusad sa Oplan TAMBAY kun Tangtangon Ang Maabusado, Badlongon sa katilingban ug Apil niini ang mga Yawan-ong buhat.

Si CCPO Director Joel Doria niingon nga sila nagpahigayon na og information drives sa kritikal nga mga dapit sa siyudad kalabot sa Oplan Tambay.

Target sa Oplan Tambay ang magsuroysuroy ug mag-estambay sa kadalanan ug gamit ang mga balaud ug ordinansa, ila kining panakpon.

Sa ilang gihatag nga data, matod sa CCPO, nga mga 85 ka tawo ang ilang gitumbok nga nakalapas, mga menor ug legal na og edad.

Ila ning gipahimangnoan kalabot sa direktiba ug gipapauli tungod sa pag-estambay sa kadalanan.

Si Doria niingon nga ang publiko kinahanglan nga mosunod sa mga balay ug ordinansa sa smoking ban, anti-drunkeness, illegal dispatching, curfew, anti-noise law, vandalism, ug maghukas sa mga publikong lugar.

Samtang si Cebu City Mayor Tomas Osmeña niingon nga modasig siya sa mga pulis sa pagpatuman sa pagdakop sa mga tawo nga magsuroysuroy sa kadalanan.

Matod sa mayor nga makatabang kini sa Siyudad sa pagmintinar sa kahusay ug kalinaw.

Sa dakbayan sa Talisay, mokabat sa 150 ka mga tawo ang nasakpan sa kapulisan nga nagsuroysuroy sa kadalanan.

Apan kadtong mga nadakpan higpit rang gipahimangnoan, matod ni Supt. Marlu Conag, acting Talisay City police chief.

Samtang ang Kapitolyo niawhag sa mga local government unit (LGU) nga wa pa’y ordinansa labot sa vagrancy o pag-istambay ingun man sa curfew alang sa mga menor de edad aron mapatuman sa hingpit ang Oplan Tambay.

Si Acting Governor Agnes Magpale gustong maprotihean o insaktong ma-handle sa kapulisan kon dunay mga bata nga masita sa kampaniya.

Sama sa Oplan Tokhang, nagtuo si Magpale nga may kaayohan ug duna sa’y negatibong epekto ang Oplan Tambay o pagsita niadtong mga mag-estambay daplin sa kadalanan ug mag-inum kon lawom na ang kagabhion. (JOB, JKV, RVC, AZLG)


VIEW COMMENTS