DAVAO CITY -- Ang bulilit nga si Ruelle “Tawing” Canino mao nalang ang walay pilde sa tanan pambato sa Cagayan de Oro sa nagpadayon nga 19th Asean Age Group Chess Championships, dinhi The Royal Mandaya Hotel.
Niposti na ang 10-anyos nga Canino, kinsa usa ka two-time Asean age group classical standard gold medalist, og limpyong tres puntos human gipilde niya si Vietnamese Tong Tai Ky An sa ikatulong round sa 10-under girls classical standard event.
Sila na Canino ug usa pa ka Vietnamese nga si Woman Candidate Master Ton Nu Quynh Duong ang nagsalo sa unang pwesto nga parehas adunay tulo ka puntos matag usa.
Ug, pwersado sila magsangka sa ika-upat nga round aron mailhan kinsa kanila ang moangkon sa liderato sa 10U girls.
Medyo mahayag na ang dalan ni Canino paglangkat sa gold kung mapilde niya si Duong sa ika-upat nga round.
“Morag si Duong nalang ang iyang lig-on nga harang ug mapilde niya, morag wala nay babag,” ingon ni Johnnel Balquin, kin sang over-all coach Cagayan de Oro delegation.
Sa nabiling pambato sa dakbayan, dako pa ang tsansa nila Mary Joy Tan (16U girls), Lorebina Carrasco II (14U girls), Euniel Capalitan (14U boys) ug David Rey Ancheta (12U boys) human mitala og dos puntos matag usa sa ilang kadaiyang kategoriya sa classical standard event.
Sila Charles Kent Gabing ug Clyde Harris Saraos parehas mipuntos og 1.5 kada usa ug mag-unay sa round four sa 14U boys division.