PATAY ang usa ka amahan human nga nahulog ug naparok ang ulo sa bato samtang nagsinumbagay sa iyang anak Merkules, June, 20, alas 7 sa gabii, sa Purok 1, Barangay Balubal dakbayan sa Cagayan de Oro.
Ang biktima naila nga si Nestor Ubas, 54, minyo samtang ang anak naila nga si Rico Ubas, 28, ulitawo nga susama nga residente sa nahisgutang dapit diin nahitabo ang insidente.
Sa pakighinabi sa SunStar Superbalita ngadto kang PO3 Lemuel Tecson, imbestigador sa Police Station 6 (PS6) sa Puerto, gikabutyag niini nga sa alegasiyon sa anak nga una lamang kining ni-aparta sa away sa iyang mga ginikanan ilabi na human nakitang gidapatan sa amahan ang iyang inahan.
Giingong sa dihang kamulo og kumusyon natumba kini ug nahulog sa kanal dayon maayong pagkaparok ang ulo sa bato.
“Ang alleged sa anak nga gikulata sa iyang papa ang iyang mama ubos sa ilimnong makahubog ni-pacify lang siya sa maong panghitabo iyang mama nabun-og, kamulo sa commotion natumba, nahulog daw sa kanal naparok sa bato ang ulo,” pahayag ni Tecson.
Dali pa nga gidala sa pribadong ospital ang biktima apan wala’y swerteng patay na kini sa paghidangat sa balay tambalanan.
Karong mga panahona kasamtangang anaa sa kustodiya sa mga otoridad ang nahisgutang suspek.