SECTIONS
Sunday July 22, 2018
SUPERBALITA CEBU

30 ka tinun-an nasudlag espiritu?

Deliverance. Si Fr. Virgilio Delloso, kura paruko sa Our Lady of Sorrows Parish sa lungsod sa Ronda, mipahigayon og deliverance ngadto sa mga tinun-an sa Ronda National High School nga giingong nasudlan og dautang espiritu kagahapon sa buntag hinungdan sa pagkasuspenso sa ilang mga klase. (Tampo ni Konsehal Eugenio Henny Layaguin)

KLASE sa usa ka tunghaan sa lungsod sa Ronda gisuspenso human sa kaguliyang atol sa giingong nasudlan og dautang espiritu ang 30 ka mga tinun-an nga babaye kagahapon sa alas 9 sa buntag.

Usa ka tinun-an sa Ronda National High School sa Barangay Palanas ang giingong unang nasudlan kay nakakita og lalakeng way nawong ug katunga sa lawas ra ang makita.

Human niini, giingong nagtakodtakod na ngadto sa ubang mga tinun-an gikan sa tulo ka mga sections sa grade 8, 9, ug 10.

Ang mga bata kalit lang mikirig, nanggahi, di kaginhawa ingon man ang uban nag-wild dihang gipangdala sa Our Lady of Sorrows Parish, diin si Fr. Virgilio Delloso mipahigayon og deliverance.

Ang uban gipangdala sa tambalanan.

Si Ms. Althea Gimena, adviser sa grade 8 section Burgos nga nahinabi sa Superbalita Cebu, nagkanayon nga mga alas 9 sa buntag nagsugod ang giingong pagka-possessed sa mga bata.

Nahuman kini sa alas 11 sa buntag hinungdan nga gisuspenso ang klase sanglit nangahadlok ug nanghilak ang ubang mga tinun-an.

Sumala pa niya nga usa niya ka tinun-an nga 15 anyos maoy unang nasudlan sayo sa sa buntag samtang nagpaabot sila sa mga sakop sa Philippine National Police sa Ronda ug Dumanjug sa ilang ipahigayong earthquake drill.

Sumala pa niya nga sa iyang pag-agi tungod sa bata, kalit kining nihilak ug daw nahadlok, maglisod sa pagginhawa, nigahi ang mga tiil ug kamot.

Usa sa mga tinun-an sab niya nga classmate gisugo niya sa pag-adto sa teachers clinic aron magkuhag bulsita kay nireklamo ang bata nga di makaginhawa.

Apan wa magdugay sa pagbalik sa iyang gisugo, gitabang na usab kini sa mga classmate kay siya na usab ang giingong nasudlan, hangtud nga nagkatapkatap ngadto sa ubang mga tinun-an gikan sa grade 8 ngadto sa grade 10.

Pipila sa mga bata dali nilang gisakay sa traysikad ug gidala sa health center.

Ang uban naulian sa paglabay sa pipila ka oras samtang ubang bata nga nag-wild gipadala ngadto sa simbahan, diin sila gipailawom sa deliverance.

Gipadayag niya nga dunay nakitang tawo ang mga bata nga usa ka lalaki nga katunga lang sa lawas ang makita.

Sa miaging tuig pa kini nagsugod diin upat sab ka mga tinun-an ang giingong nasudlan sa dautang espiritu.

Nibalik kining maong problima sa miaging simana human usa ka tinun-an sa grade 8 gibalikbalikan nga pakit-on sa lalaki nga way nawong ug katunga lang sa lawas ang makita.

Gi-usban sa pagpakita ang tinun-an niadtong Miyerkulis hinungdan nga wa lang una nila pa-eskwelaha kay ka-upat na kahigayon siyang gibalikan sa dautang espireto.

Gipatawag nila ang ginikanan niini kay nabalaka na usab siya sanglit sa panahon nga moeskwela, pakit-on kini.

Gawas niini, ang ubang mga bata nisulti nga motabon na sa iyang mga mata ang mao nga tinun-an dayon malumoy, mogahi ug mamugnaw ang mga lapalapa ug palad sa kamot.

Sa ilang nahibaw-an ang likod nga bahin sa maong tunghaan gikatahong gihimo kining menteryo sa mga Hapon atol sa Ikaduhang Gubat sa Kalibutan.

Gitinguha nila nga magpamisa ug mabindetahan ang ubang dapit sa tunghaan aron mawala ang mga dautang espiritu.


VIEW COMMENTS