NAKABSAN sa kinabuhi ang usa ka lalaki human nga gitabangan kini og kulata sa wala maila nga mga suspetsado niadtong June 20, mga alas 9 sa gabii diha sa dalan Tiano-Gomez Streets ning dakbayan sa Cagayan de Oro.
Samtang nagpaalim sa balay tambalanan si Rowe Macalaba, 46, bulag sa asawa ug residente sa Zone 3, Pinikitan ning dakbayan.
Sa pakighinabi sa SunStar Superbalita ngadto na kay P/Chief Insp. Julius Clark Prisco Macariola, hepe sa Police Station 1 (PS1) sa Divisoria, padayon pa ang ilang imbestigasiyon kalabot na sa maong panghitabo aron maila ang identipikasiyon sa mga suspetsado.
“Karon sige tag follow-up ani para makakuha lang gyud ta og information regarding aning identity aning mga tawhana” pahayag ni PCI Macariola.
Gidugang ni Macariola nga naabtan pa nila ang maong biktima nga nagkadugo na ang nawong.
“Pagresponde nato didto naa tay nakita nga usa ka lalaki nga dugoan na ang iyahang nawong, naa na siya sa semento nagtawag dayon ta og Oro rescue para mohatag og kaukulan nga medical attention ug kini gidala siya sa Northern Mindanao Medical Center” dugang niini.
Nasayran basi sa kuha sa CCTV gitouhang duha ka mga wala mailang suspek ang naghimo sa maong pagpangulata apan gisuta pa kini pag-ayo tungod na usab kay natabunan ang lugar kung diin natigayon ang panghitabo.
Sa inisyal nga nakuha nga motibo sa maong panghitabo gikabutyag nga balos matud kini gumikan kay aduna kini nakabingkil.