SECTIONS
Monday July 23, 2018
SUPERBALITA CEBU

P4,000 na ang financial assistance sa matag senior citizen sa Talisay

MATILAWAN na sa mga senior citizen sa dakbayan sa Talisay ang umento sa ilang pagadawaton nga cash assistance sugod ugma, Lunes.

Kini human naaprobahan sa konseho sa Talisay ang umento sa financial assistance nga ilang ihatag ngadto sa mga senior citizen niadtong Hunyo 7.

Matod ni Talisay City Mayor Eduardo Gullas nga dako ang natabang ug natampo sa mga edaran alang sa kalambuan sa ilang siyudad hinungdan nga nakamugna siya sa inisyatiba nga pausbawan ang hinabang niini.

Kaniadto, P1,000 lang ang madawat sa mga senior citizen, apan karon, P4,000 na ang ilang makuha matag tuig ug ipanghatag kada upat ka buwan.

Si Felipa Solana, pangulo sa City Social Welfare and Development Office (CSWDO) sa Talisay, nagkanayon nga ang gihimo nga lakang sa mayor dako og tabang ngadto sa mga edaran ilabi na sa mga aduna nay gipang-maintain nga tambal alang sa ilang sakit.

Ang pagpang-apud-apod sa cash assistance ngadto sa 12,928 ka mga senior citizen magsugod karong Lunes hangtud sa Biyernes sa mga barangay sa Talisay.

Sa Rehiyon 7, adunay 270,900 ka mga senior citizen ang nakadawat na sa ilang hinabang samtang 78 na sab ka centenarian ang nakadawat sa ilang tag P100,000 nga pensyon gikan sa Department of Social Welfare and Development (DSWD) gikan niadtong Enero hangtud karon buwan sa tuig.

Ang mga social pensioner nga gisawo sa DSWD ug CSWD mao ang mga tiguwang nga walay mga pensyon gikan sa Social Security System (SSS), Government Service Insurance System (GSIS) ug Philippine Veterans Affairs Office (PVAO). (Jude Suhot)


VIEW COMMENTS