SECTIONS
Monday July 23, 2018
SUPERBALITA CEBU

Laing 3 ka menor na-rescue gikan sa cyber porn sa Cordova; 22 anyos nasikop

NABALHOG karon sa prisohan ang usa ka 22 anyos nga babaye human niya giingon nga gibaligya ang tulo ka mga menor aron mohimo og malaw-ay nga buhat sa internet sa kantidad nga P3,000 matag usa sa Sitio Puso, Barangay Poblacion, lungsod sa Cordova.

Nasikop sa PNP Anti-Cybercrime Group 7 si Maria (di tinuod nga ngalan) samtang na-rescue usab ang tulo ka mga batang babae nga mao’y gigamit niini sa online sexual exploitation, nagpangedaron og 15 anyos ug duha ka 12 anyos.

Ang maong operasyon gipangulohan ni Chief Inspector Leo Dofiles, hepe sa Anti-Cybercrime Group (ACG) 7 kagahapon sa alas 10 sa buntag diin lakip nga naluwas ang usa ka 4 anyos nga babaye ug duha ka lalake nga anak ni Maria nga nagpangedaron og 2 ug 5.

Ang 12 anyos nga biktima naluwas sulod sa balay mismo ni Maria diin ang laing duha ka biktima anaa sa duol nga balay sa Barangay Poblacion.

Bisan pa kon wala gitanyagan ang 4 anyos nga batang babaye ug duha ka anak ni Maria sa entrapment, apan lakip sila nga gisusi kon wa ba usab sila gigamit sa illegal nga buhat ni Maria.

Giingon nga motanyag si Maria sa iyang mga silingan nga menor ngadto sa mga langyaw sa internet.

Mag-atubang kini og kasong kalapasan sa Republic Act 9208 (Anti-Trafficking in Persons), as amended by RA 10364 (Expanded Anti-Trafficking in Persons) ug RA 10175 o ang Cybercrime Prevention Act of 2012.

Niadtong Hunyo 9, nasikop sa kapulisan ang usa ka babaye ug naluwas ang unom ka mga batang babaye gikan sa online sexual exploitation atol sa entrapment operation sa Barangay Ibabao, lungsod sa Cordova.

Mga sakop PNP Woman and Children Protection Center – Visayas Field Unit (WCPC-VFU) nakasakop kang Donna (di tinuod niyang ngan) nga nagtanyag nga iyang abusohan nga sekswal ang duha sa mga biktima, nagpanuigon og 3 ug 12 – bugti sa kwarta sa mga kustomer.

Ang gidudahang trafficker, gibana-banang nagpanuigon og mid-20s ug gituohang mabdos, gipanid-an sa kapulisan sud sa pipila ka mga buwan sa wa pa ilusad ang operasyon.


VIEW COMMENTS