WA'Y kalainan sa pagpunit og bato aron idakol sa kaugalingong ulo. Ingon ini ang paghakop sa labing kutas nga katungdanan: ang paghaw-as sa nasod nga naunlod sa lunangan.
Apan bisa’g gasanga-sanga ang sungay sa mga suliran, sutoy gihapon ang kundat sa mga kandidato. Aguroy, bahala’g mangliki ang ilang agtang ug bagol-bagol kutob sa panganod sa ilang pangandoy. Barogan gyod kuno nila ang katilingbanong kaayohan pinaagi sa ilang pangalagad. Gani, andam pod silang mosirko-balintong ug mobakliad aron saligan ang ilang mga panaad.
Tuod man, dihang nahidangat sa Sugbo ang mga kandidato sa pagkapamuno sa nasod bag-ohay lang, gipainat na pod nila ang dunggan sa ilang mga tigpaminaw sumpay sa ilang laway. Ug bisan pa’g gapakong sa ilang tigi nga tuohan sa mga botante, nagkauyon baya ang ilang mga tumong alang natong tanan: Pagbangon gikan sa kalisdanan. Pagpadayon sa kalamboan.
Apan sayod ta nga sayon ra sultihon ang lisod buhaton. Ug kini sagad mao’y nasuta nato sa mga kandidato nga nilampos sa ilang kampanya apan wala’y natuman sa ilang gipangyamyam.
Apan dayag nga ang nasod wala gihapon katilaw og tagam. Kay tataw nga wala ta mangahas pagpalugway sa atong mga pangutana nganong nagpabilin gihapon ang naandan.
Nisamot ang atong pagkatiurok gumikan sa atong kalaay sa pagbantay sa atong mga politiko aron pod sila mahagit pagmatngon sa ilang gipanumpaan.
Ay, kutob ra gyod atong pagtagad sa haling sa panahon sa piniliay, ug wala na ta’y panumbaling ug pakisayod kon lugaw nga bahaw ra’y igong gihaon sa mga politiko.
Unsa’y ilang mga kalamposan nga ilang nahikay alang sa katilingban sa wala pa sila milansar? Unsa’y mga hilisgotan nga ilang gitindogan nga nisangpot sa lungsoranong kahimsog—labaw sa kaugalingong katagbawan—atol sa miagi nilang pangatungdanan?
Nganong gapanilap man gyod ni sila sa ilang pagsikad ug pakiglumba aron lang makaangkon sa labing labad nga tahas sa pangagamhanan?
Pasagdan lang ba gihapon nato ang kandidato sa ilang pagtuo nga humok ra tang motulon sa lapok sa ilang gipamulong?
Bitaw, unta tilokon nato ang mga pangutana sibo sa atong kagutom sa kausaban.
Unta dili na mausik ug masilhig—wa’y kalainan sa mga mumho—ang atong pagsalig.
Angay gyod tang iugbok sa kabatoan kon dili gihapon ta pul-an paglumlom diin lapaw sa atong ulo ang lamaw sa paglaom.
(geemyko@gmail.com)