KADAGHANAN wa makadayag sa ilang pagmahal kang Press Sec. Cerge Romonde niadtong buhi pa. Apan karong patay na, ilang gipabuhagay ang tumang pagmahal ug way laing gibungat nga pulong gawas sa mga pagdayeg.
Gihatod si Cerge sa liboan ka mga tawo hangtod sa iyang lubnganan sa sam-ang sa lungsod sa Argao kagahapon ug nagpatulo sa ilang luha - timaan sa ilang nagmahal sa Kilihim sa Prensa.
Makapamalandong na lang kita nga way usa kanato ang makapugong sa tawag sa kamatayon, maayong andam gyud kita kanunay kay wa kita masayod kon kanus-a kini moabot.
Samtang karong tua na sa laing kalibotan si Cerge, ang iyang mga patulun-an ug ehemplo nga gibilin maayong mohagit kanatong nia pa sa mortal nga kalibotan sa mga buhi.
Alang sa mga yanong taga Argao o bisan asang dapit, klaro nga gipakita ni Cerge nga di imposible ang kalamposan taliwala sa kalisod. Ang edukasyon maoy nahimo niyang taytayan ngadto sa kabantog ug pagkainila sa tibuok nasod.
Taliwa sa iyang mga kalamposan, wa siya malimot sa iyang gigikanan sa Argao ug gibahinan kini sa grasya nga iyang nadawat - mga proyekto, scholarship ug daghan pa.
Mabulukon usab ang iyang kinabuhi sa pagkabana labina sa iyang unang napili sa karera sa media.
Kanimo Cerge, daghang salamat sa pagdasig kanamo diha sa imong kamatayon.
r