MGA alas 7:30 sa gabii sa Hunyo 19, 2002, nagmaneho sa iyang PUJ si Lito. Trapik niadtong higayuna hinungdan nga hinay ang pag-irog sa mga sakyanan atubangan sa usa ka mall.
Duna lang siyay usa ka pasahero niadtong higayuna nga naglingkod sab sa frontseat nga mao si Danny. Sa kalit lang nisinggit si Danny og tabang. Sa iyang paglingi, iyang nakit-an si Chris nga nidunggab kang Danny.
Katunga sa lawas ni Danny diha sud sa jeep samtang ang iyang mga tiil diha sa tikanganan. Iyang gipahunong ang sakyanan ug tabangan unta si Danny pinaagi sa pagkupot sa mga kamot ni Chris.
Apan siya na usab ang gidunggab ni Chris tumong sa walang tuhod. Gitukmod ni Lito si Chris, kinsa daling niikyas.
Nikanaog siya sa iyang PUJ apan wa na siya makagukod pa kang Chris tungod sa nagkadugo niyang tuhod. Iyang nabantayan nga si Danny wa nay panimuot nga gidala sa tambalanan.
Sa mga alas 2 sa kaadlawon pagkasunod adlaw, namatay si Danny sa ospital.
Giadto sa mga pulis ang balay ni Chris, kinsa wa didto. Gikuyogan sa inahan ni Chris ang mga pulis, kinsa didto maabti sa balay sa iyang ugangan.
Ilang gidapit si Chris sa police station kalabot sa pagpanunggab. Nanghimakak siyang siyay nidunggab kang Danny.
Iyang gitumbok ang iyang igsuon nga si Inciong nga maoy nidunggab kang Danny.
Niangkon siyang nag-inom sila uban sa iyang mga silingan ug igsuon. Nilakaw siya makadiyot, apan nibalik. Nananghid siya sa iyang igsuon nga mopauli apan gipugngan siya niini.
Paglabay sa 30 minutos, nilakaw siya, apan niapas kaniya si Inciong kinsa nagkadugo ug nisulti nga nakadunggab siya.
Matod niya nga wa niya pangutan-a ang iyang igsuon kon kinsa ang nadunggaban. Nianang pagkasunod adlaw siya ang gidakop sa mga pulis.
Ang iyang bayaw nibutyag sab nga si Inciong maoy niabot sa balau nga nagkadugo ug hubog. Natug kinig usa ka gabii sa ilang balay, apan nibiya pagkasunod adlaw.
Motuo ka ba sa gipanulti sa akusado nga ang iyang igsuon maoy nidunggab kanila ni Danny ug Lito? Wa kaha masayop si Lito sa pagtudlo kang Chris nga maoy mamumuno? Wa moeskapo si Chris, kon di ang iyang igsuon. Busa, kon ikaw ang pahukmon, sad-an ba si Chris o di?