USA ka bakol nga drug pusher ang nasikop sa buy-bust operation sa kapulisan sa Carcar niadtong Sabado sa hapon.
Ang nasikop mao si Jhazan Matugas, 29, ulitawo, ug taga Sitio Cambuntan, Barangay Bolinawan, dakbayan sa Carcar.
Si PO1 Gilmer Noval, desk officer sa Carcar police nga nahinabi sa Sun.Star Superbalita, niingon nga nakuha gikan kang Matugas ang upat ka mga pakete sa gituhoang shabu, usa ka plastic bag ug marked-money nga nagkantidad og P250.
Matod ni Noval, si Matugas gitanggong na sa detention cell sa Carcar ug gikatakda nga pasakaan og tukmang kaso karong adlawa sa paglapas sa balaod batok sa ilegal nga drugas.
Si PO1 Alex Buanghog, poseur-buyer, niingon nga kanunay na nilang gipanid-an ang operasyon ni Matugas sa ilegal nga drugas sa Awayan, Carcar hangtod nga gihimo ang pagronda sa suspek.
Kauban ni PO1 Buanghog sa raiding team mao sila si PO1 Julius Aniñon, PO3 Rolando Gantuangco ug PO3 Alex Padin.
Dugang ni PO1 Buanghog, pulos baldado na ang duha ka tiil ni Matugas ug magsakay kini og traysikol uban sa laing tawo nga mokrang sa motorsiklo o mosikad apan siya ang maggiya sa manubela.
“Diha lang ang iyang transaksyon sa traysikol,” matod ni PO1 Buanghog.
“Pagtunol niya sa butang (dugas) ug pagdawat sa marked-money, gipahibalo dayon nila ang dakop,” dugang ni P01 Buanghog.