BISAN sa nahibilin pa nga pito ka buwan alang sa hingpit nga pagtapos sa Cansaga Bay Bridge, 97 porsiyento na nga kompleto ug magamit na sa publiko sa sunod buwan.
Busa gisubhan na kagahapon sa buntag ni Pres. Gloria Macapagal-Arroyo ang maong taytayan nga nagsumpay sa Barangay Paknaan, dakbayan sa Mandaue ngadto sa lungsod sa Consolacion.
Atol sa paghiabot sa president kagahapon, alas 10:00 sa buntag gikan sa tugpahanan sa Mactan, nilahos kini sa Paknaan aron pagbukas sa marker sa utlanan sa maong tulay.
Usa ka mubo nga programa ang gipahigayon diin mapasigarbuhon si Gob. Gwen Garcia sa kalampusan sa royekto ug pagtunol sa iyang pasalamat ngadto sa presidente.
Namulong usab si Kong. Nerissa Soon-Ruiz sa sixto distrito nga dako og ikatabang ang maong taytayan sa kalamboan sa distrito.
Si Arroyo nagpasalamat usab sa init nga paghangop sa mga Sugboanon ug nagpasalamat sa bag-ong hepe sa Department of Public Works and Highway (DPWH) nga si Victor Dominggo.
Natagbaw si Arroyo sa kapaspas sa trabaho sa proyekto nga gisugdan niadtong Disyembre 10, 2008 ug gikatakda nga matapos saAgusto 2010.
Samtang, si Mandaue City Mayor Jonas Cortes masaligon nga molambo ang pamatigayon sa dakbayan ug mga silingang lungsod, lakip sa pagminos sa kahuot sa trapiko sa Cebu North Road.
Ang Cansaga Bay Bridge adunay 1,250 meters nga gigahinan og P2.3 bilyunes gikan sa nasudnon nga panudlanan. (FVQ)