GIPASIDUNGGAN sa 21-gun salute sa Armed Forces of the Philippines (AFP) si Press Sec. Cerge Remonde una gilubong kagahapon sa hapon sa iyang yutang natawhan sa lungsod sa Argao, Sugbo.
Lakip sa liboan ka mga tawo nanamilit ni Cerge mao sila si Pres. Gloria Arroyo, Gob. Gwen Garcia uban sa mga nasudnon ug lokal mga opisyal.
Diha usab sila si Bise Pres. Noli de Castro, Tourism Secretary Ace Durano, Trade Secretary Peter Favila, ug Presidential Adviser for Central Luzon Lorelei Fajardo.
Ang lawas ni Remonde gipahiluna sa ilang mausoleum sa namatayng opisyal sa Argao Municipal Cemetery, alas tres kagahapon sa hapon.
Gawas sa 21-gun salute, si Remonde gideklarar nga liutenant colonel sa reserve forces sa AFP.
Adunay mga balloon nga gipalupad dunay gisuwatan og “Thank You, Goodbye Honorbale Cerge M. Remonde.”
Si Marit Stinus Remonde, asawa ni Remonde, igsuon niya nga si Hermes Alburo ug ang radio commentator nga si Rey Langit nangulo sa pagsira sa lungon sa dihang gisud na kini sa nitso sa Mamites Family Mausoleum.
Si Stinus-Remonde sa iyang pakigpulong nipadayag sa iyang dakong pasalamat sa mga higala ni Remonde nga nikuyog sa ilang pagsubo.
Nidugang siya nga nasubo kaayo siya sa pagpanaw sa iyang bana apan nasayod siya nga ang ‘memory’ sa iyang bana magpabilin kini ilabi na sa mga kinabuhi nga iyang na-touch.
Sa iyang bahin, si Alburo nipadayag nga karon lang niya natugkad kon giunsa sa pagmahal ang iyang iguson dihang nakakita siya sa bagang bul-og sa katawhan gikan sa paghaya niini sa Heritage Memorial Park sa Taguig, Malacañang Palace sa Manila, Malacañang sa Sugbo ug sa Diosdado Macapagal Sports Center sa ilang lungsod sa Argao.
Si Remonde namatay tungod sa pag-ataki sa sakit sa kasingkasing niadtong Martes sa banyo sa iyang balay sa Makati. Nadala pa siya sa ospital apan pipila ka gutlo, gideklarar siya nakabsan sa kinabuhi.