SECTIONS
Thursday July 19, 2018
SUPERBALITA CEBU

Tambagi ko Noy Kulas: Mabdos

Dear Noy Kulas,

Good day to you! Ako si Adel, taga Cebu ra. Kining akong problema parte ni sa akong pagmabdos karon. Ang amahan aning akong gisabak karon usa ka seminarista. Maguwang ko niya og mga 10 ka tuig kay dugay ko nag-uyab-uyab tungod sa akong parents nga mga tiguwang na.

Nakahibawo na siya nga mabdos ko, pero sukad nga ako siyang gisultihan, tagsa na lang siya mo-text nako ug kon akong tawgan, di siya motubag kay busy kuno siya kay toa siya sa layo nga lugar. Ako siyang giingnan nga iyang obligasyon ang akong gibuntis, pero wa gihapon siya motubag. Mo-text ra siya nga mangumusta pero di na mo-reply kon mo text ko.

Unsa may akong buhaton karon aning akong sitwasyon? Mga tulo na ka buwan ang akong tiyan ug medyo klaro na og gamay kon mag fitting ko og senina. Mapugos ba nako siya pag-angkon aning akong gibuntis karon? Nakahuna huna kong ako ning ipa abort kay mauwaw ko nga magmabdos nga way amahan kon di siya manubag ani. Sure kong masuko ang akong pamilya kon mahibawo sila.

ADEL

Del,

Di ka ra ba makapugos sa pagpaangkon niya nga ikaw ang amahan sa yano lang nga paagi. Labina nga toa tingali siya sa layo nakabase. Maayo unta kon duol ra kay kon magkinaunsa, mahimo siyang mabisitahan o pakigkitaan.

I don’t think naa siyay plano nga moangkon sa bata kay kon naa pa, nanawag na unta na siya nimo. Basin na-belong na siya sa mga lalake nga kon momabdos na ang babaye mag-DNA (di na ako). Daghan na ang ingon ani nga mga lalake.

Kon seminarista siya, mahimong mo-contact ka sa religious order diin siya nahisakop aron makahibawo ang iyang mga labaw. Sa ingon niini, masultihan siya sa iyang kaakuhan diha nimo. Aron usab mahukman sa ilang order kon angayan ba siyang papadayunon sa iyang kinabuhi sa seminaryo karon nga mabdos ka.

Ayaw ipa-abort ang imong gisabak kay di kana maoy sulbad sa imong problema. Huna-hunaa, daghan sa mga babaye nga nanghamtong na nga way anak, apan naghandom makaangkon og usa. Di baya lalim nga kon ikaw matiguwang na, posibleng mag-inusara lang. Magpasalamat ka sa Ginuo nga dunay usa ka kinabuhi nga iyang gitugyan kanimo. Atimana ug panggaa aron suklian ka og pagmahal sa umaabot mong anak.

NOY KULAS

(Alang sa problema, e-mail sa kulassuper@sunstar.com.ph ug rojval69@yahoo.com)


VIEW COMMENTS