Roldan: Gangster si father

UYON ba mo nga armasan ang mga pari? Kini ang sagad natong madunggan nga pangutana sa taga-media sa madlang pipol human sa sunod-sunod nga pagpamatay sa kaparian dinhi sa nasud.

Ang katapusan mao si Fr. Nilo nga aktibong kritiko sa simbahang Iglesia ni Kristo.

Bisan kung aduna nay mga tawo nga nadakop kabahin sa iyang pagkamatay, dunay pipila ka mga anggulo nga gitun-an sa tinuod nga lingtunganay sa iyang kamatayon.

May nag-ingon nga chicks adarit daw ang pari. May nag-ingon sab nga giresbakan siya sa simbahan nga iyang gitirahan sa pulpito ug sa publikong hawanan.

Nakita ko sa internet ang mga public forum ug "expose" kabahin sa tinuod nga Iglesia ni Kristo diin iyang lantarang gihagit ang mga ministro niini ug debati.

Gipamahayag sa kadagkoan sa Philippine National Police nga dul-an 200 ka mga pari ang naghupot ug lisensiyadong armas nga pang-isport.

Daghan na man god karon ang shooting competition ug pag-abli og mga shooting range diin puwede nga mag-test firing ang may kuwarta.

Sa usa ka shop diha duol sa airport, puwede kang makapabuto og 40 ka rawnds nga bala sa usa ka libo. Kuwarta ray agdon kay bisan unsang armas nga gibaligya sa shop puwede nimong gamiton. Tungod sa kahinam, daghang kaparian nga naengganyo sa pagpalit og armas dili tungod kay aduna silay kontra, kon dili tungod sa isports.

Apan dili uyon ang Catholic Bishop's Conference of the Philippines nga armasan ang ilang pari. Dili sila gusto nga mahimong gangster si Father. Tiaw mong tigsabwag sila sa maayong balita sa kaluwasan ug kabililhon sa kinabuhi unya puwede diay silang mokutlo og kinabuhi?

Sa laing bahin, tawo ra man pod si Father. Sama sa ordinaryong tawo, adunay dili makauyon sa iyang gawi, sinultihan ug bangi sa personalidad. May pari nga grabing ka-estrikto nga dili na mokasal kung nadelatar og usa ka oras ang pag-abot sa kaslunon. Wala siyay labot kung pila ka baboy na ang naihaw o ang dako nga preparasyon sa maong kasal.

May pari sab nga dili mokasal kung mabdos na ang kaslunon nga babaye. Ngano daw'ng nag-una-una nga wa pa kasla? May pari sab giralihan sa iyang parokyano kay wa makauyon sa batasan. Gipangtanggal sa maong pari ang mga lideres niini sa parokya kay nagbuot-buot.

Tubag sab sa pari sa mga raliyista "pagpari una mo."

Sa pagkatinuod, maingon nato nga haring gangis ang kura paruko sa iyang parokya ug sa iyang Obispo ra siya makapalagpot kaniya.

May paring Amerikano nga akong nakaila kaniadto nga nag-wild kay nasipyat sa pag-parking ang drayber sa iyang kumbento. Dili malikayan nga aduna gayuy masuko ug moresbak sa pari.

Apan para kanako dili kini igong rason nganong armasan sila. Wa man gani madayon ang plano nga armasan ang mga kapitan sa barangay nga sila pa ang daghan og kontra.

Kahibalo sab ko nga mas daghan nga pari dili gusto og armas. Tiaw mong imbis Bibliya, Misal ug rosaryoan, ila nang bitbiton ang pusil kung asa sila moadto?

Mas maayo pang ayuhon nila ang ilang abilidad sa pagkabig sa maayong relasyon sa katawhan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph