MING-ALARMA karon ang mga kritiko sa administrasyon. Morag natil-asan sa mando ni Pamuno Duterte pagdakop sa mga estambay sa kadalanan sa bisan asang dakbayan ug lungsod sa nasod.
Husto sila sa pag-ingon nga ilegal ang pagdakop sa mga estambay kay wa pa may balaod batok niini gikan sa kongreso.
Apan naay mga ordinansa nga nagdili niini sa mga dakbayan ug lungsod.
Sama sa anti-loitering, curfew, ug anti-drinking in public nga gipatuman sa pipila ka mga dapit, apan di kanunay hangtod nga gikalimtan na lang sa pag-implementar sa mga awtoridad.
Sa among lungsod pananglitan, maayo lang sa sinugdanan sa pagpatuman sa ordinansa sa curfew alang sa mga minor gikan alas diyes sa gabii hangtod na sa alas tres sa kaadlawon. Karon, wa nay gimok ang maong sordinansa.
Dinhi sa siyudad morag duna say mga ordinansa sa anti-loitering, curfew sa minors ug anti-drinking in public nga wa na mapatuman. Dinhi gyud ko mag-high school ug mag-kolehiyo hangtod sa akong panarbaho.
Ako nagtuo nga tulo ang mga epekto ning dakop-tambay (estambay sa atong lingo). Una, makaayo kini sa kalinaw sa komunidad kay maminos ang kriminalidad sama sa paregla, tripping sa mga batan-on, akyat-bahay, burglary, theft, robbery, drug-abuse ug uban pa.
Ikaduha, mayatakan ang tawhanong katungod sa libreng lihok (free movement), paghanggap sa lab-as nga hangin sa kagabhion, pagsuroy-suroy sa parke, pagtambong sa kalingawan ug uban pa.
Ikatulo, modaylang ang mga abuso sa abusadong mga pulis nga magpatakag panakop tungod sa gana lang nila o resbak sa ilang gikalagutang mga tawo o tripping- hinanggaw lamang.
Aron di mahitabo ang pagyatak sa tawhanong katungod ug mga abuso sa kapulisan gikinahanglan ang mga makatarunganong guidelines sa pagpanakop base sa mga ordinansa.
Di ba magpandayg nasudnong balaod (national law) mahitungod ning maong pagpanakop aron kalikayan ang gikahadlukang mga abuso. Ning bahina mapatumaw ang katarong di pagpanlupig sa mga awtoridad.