USA ka dakong tanghaga nga milimin sa Philipine National Police (PNP) kon nganong gawasnon man kadtong negusyante nga Intsik nga napatay niadtong Martes nga unta nagdakpan man diay kadto niadtong 2015 human makuhai og 45 ka kilo nga shabu.
Si Gary Go, kinsa naaresto sa usa ka drug bust didto sa Quezon City, ang gipusil-patay sa lungsod sa Cordova sa Mactan Island niadtong Hunyo 26.
Sa gihimong pakisusi nasayran nga kini diay si Go usa ka binilanggo tungod sa pagkalambigit sa gidiling drugas.
Ang record nagmatuod nga kini siya nadakpan niadtong Hunyo 11 atol sa buy bust operation sa Quezon City District Anti-Illegal Drugs Special Operations Group sa West Avenue sa maong dakbayan diin kuyog sa usa ka babaye nga giilang Sierralyn Borromeo.
Matod pa nga kini siya lumad nga taga Cebu ug nagpuyo didto sa Woodland Subdivision, Angeles City, Pampanga.
Ang police director sa Quezon City nga si Joselito Esquivel, sa dihang gipangutana kalabot niini, miingon nga ila pa kining gisusi kon unsa ang status niini sa prosecutor’s office.
In fairness, niadtong 2015 dili pa si Esquivel maoy policer director sa Quezon City ug hayan wa siyay kalibutan kalabot niini.
Pero kahibawo ba mo og kinsa ang police chief sa Quezon City niadtong panahona?
Sa atong pag-usisa, nigawas nga si Chief Superintendent Joel Pagdilao, ang usa sa lima ka police general nga gihinganlan ni Presidente Rodrigo Duterte nga nalambigit sa gidiling drugas.
Posibli nga kadto si Go, tawo ra usab ni Pagdilao ug hayan sud-gawas ra usab kini sa bilanggoan tungod kay lig-on kaayo ang nagpaluyo.
Si Pagdilao uban sa kanhi usab QCPC nga si Edgardo Tinio gi-dismiss tungod sa susamang kaso.
Pila pa kaha ka Gary Go ang padayon karon nga gawasnon?