PATAY ang kontroberysal nga pulis nga si SPO1 Adonis Dumpit human giingong naengkwentro sa mga taga National Bureau of Investigation (NBI) Bohol Provincial Office ug Regional Intelligence Division sa Barangay San Isidro dakbayan sa Tagbilaran alas 8:20 kagahapon sa buntag.
Giingong nilusad og operasyon ang NBI ug RID-7 batok kang Dumpit pinaagi sa pag-intercept o pag-abat unta nini.
Giingong nisukol nga niresulta sa pinusilay nga gikamatay ni Dumpit, kinsa nadestino sa Bohol Police Provincial Office.
Apan ang kapuyo ni Dumpit nga si Maria Ella Amores nipasangil sa NBI ug kapulisan nga ambush ang nahitabo, di buybust operation.
Matod ni Amores, sayong nangandam si Dumpit aron mo-duty isip gate police tungod kay alerto sila sugod kagahapon.
Moabot usab si Police Regional Office 7 Director Debold Sinas alang sa pagpangandam sa seguridad sa pagbisita ni Presidente Rodrigo Duterte sa Bohol karong adlawa.
Nagdala kini og libro nga iya sa pag-umangkon ni Amores aron ipa-photocopy.
Paggawas sa balay sakay sa iyang motorsiklo, nakita niya ang paghaguros sa usa ka puti nga Toyota Fortuner nga migukod kang Dumpit.
Mga 50 metros ang gilay-on sa ilang balay, aduna dayoy usa ka blue van nga mibabag sa karsada samtang ang mga sakay nga armado nikanaog ug dayong paarak sa ilang dala nga armas.
“Wala ray five minutes, naa nay nag buto-buto. Pagbuto buto, nagtuo lang ko nga tungod sa fiesta diri sa amoa. Ang akong pag-umangkon nga 3 years old nga iyang pinangga, nibalik diri sa sulod niingon si Daddy (Dumpit), Nay, gi bangbang. Paggawas namo, daghan nang tawo. Mao na to gipusil siya,” asoy ni Amores.
Di durugista
Gihimakak usab ni Amores nga nalambigit sa illegal nga drugas si Dumpit kay dako kini og kasilag.
Gani, daghan na kini og gipangpusil nga drug personalities.
Gani ang dala nga kwarta P700 lang diin ang P500 niini ibayad sa photocopy sa libro sa iyang pag-umangkon samtang P200 maoy bawon sa paniudto.
“Sus, Ginuo ko, og mao naman lang nga ingon anang bahin sa drugs, mopatay man gani tog makakita nga dili siya makasabot nga naay tawo nga kadudahan diha nga naay drugs,” dugang ni Amores.
Mokabat sa 15 ka medium packs ang giingong napalgan sa mga operatiba sa bulsa ni Dumpit.
Matod ni Atty. Renan Oliva, NBI Bohol director, nagkanayon nga joint operation sa PNP ang ilang gihimo ug giingong dugay na nilang gi-monitor ang illegal activities ni Dumpit sa lalawigan sa Bohol.
Niadtong Mayo 25, 2018 ang PIB Bohol nakasikop ni Sergio Tahanlangit sa buy bust operation.
Apan, ang nakasikop niini nga pulis giingong gitawgan ni Dumpit aron ipa-downgrade ang kaso, inay Section 5 himuon kining Section 11 sa Comprehensive Dangerous Drugs Act of 2002, apan gibalibaran.
Pipila ka adlaw ang nakalabay, ang sakyanan sa nakasikop nga pulis girakrakan ug nianang pagkagabii, gipangita matod pa ni Dumpit uban sa usa ka wa mailhing lalake nga gireklamo usab dayon sa NBI ug 8888.
Narco cop?
Gipaubos dayon sa NBI inabagan sa Intelligence branch sa Bohol PPO.
Nasuta nga si Dumpit usa ka narco cop diin midako ang iyang illegal activities sa dihang nadestino niadtong 2016.
Di mangunay sa pagpamaligya si Dumpit kay aduna siyay mga downline nga drug player.
Matod ni Oliva nga adunay higala nga dakong drug lord sa Bohol nga gitago lang una sa NBI ang ngalan niini alang sa umaabot ngaoperation.
Nagpadayon ang pagpaniid sa NBI hangtod nga kagahapon, nakakuha sila og report nga mo-deliver pa kini og drugas hinungdan nga ilang gisundan gikan sa balay niini.
Sa dihang ilang gibabagan ug nagpailang mga sakop sa NBI ug PNP, giingong giunhan sila sa pagpusil, wa nay nahimo ang mga operatiba gawas sa pagbawos.
“Nataymingan lang ganina sa atong operatives ug sa operatives sa PNP who tailed him pag- intercept sa atong tropa, hunong nanaog ang joint team nagpaila nga NBI ug PNP. Ang subject who was driving a motorcycle gi slide niya iyang motor, gi-engage ang atong elements. Walay recourse atong joint team, nga to fire back,” asoy ni Oliva.
Ang regional office sa NBI nasayod sa joint operation nga gilusad sa NBI Bohol ug sa RID 7 batok kang Dumpit.
Wa makita sa NBI 7 ang panginahanglan alang sa internal investigation o bisan unsang matang sa pakisusi sa mao nga hitabo.
Matod ni NBI 7 Regional Director Patricio Bernales, nihimo og koordinasyon ang mga operatiba sa NBI Bohol sa iyang opisina sa wa pa gilusad ang joint operation
Naguol, di motuo
“I’m very sad. and I really feel bad about the whole situation.”
Mao kini ang padayag ni Cebu City Mayor Tomas Osmeña sa pagkamatay ni Dumpit
Sumala pa niya nga di siya motuo sa alegasyon nga nalambigit sa illegal nga drugas si Dumpit kay maayo kini nga pulis ug close-in aide niya kaniadto.
Dugang pa ni Osmeña nga wala na siyay labot kon adunay mga alegasyon nga siya mismo drug protector.
Si Dumpit gitudlo makadiyot ni Osmeña isip caretaker sa Barangay Ermita dihang gisuspenso ang tanang mga opisyal ubos ni anhing barangay kapitan Felicisimo “Imok” Rupinta.
“I don’t care. They always try to do that. Even Bato (kanhi PNP Director General Ronald “Bato” de la Rosa) said I’m not involved in drugs, even PDEA said I’m not involved. They can revive everything that is against me...they will say so many things but what i’m feeling right now is im so sad for Adonis. And if I am his protector, he will be operating here. How come he’s not here? How can I protect him in Bohol?” sigon pa sa mayor. (Dugang taho ni AZLG, Christine Joyce Secuya, Lloyd Earl Sabequil, CNU Interns)