NIDAKO NGA KABUS
Ang amahan ni Juliet nga si Rodresito, Jr., usa ka karpintero sa construction. Nakuryentehan kini sa construction site niadtong 2000 nga miresulta sa temporaryong pagkabalda sa iyang mga kamot nga mikulo.
Giangkon ni Esabelita nga ang gisaligan nila kaniadto mao lamang ang P1,700 nga disability pension ni Rodresito matag buwan.
"Lisod gyud kaayo ang kinabuhi. Mao nga ako, nialalay gyud ko sa akoang bana. Naglaba ko. Manicure, pedicure, ana. Usahay, maka-laba ko. Usahay wala pod," saysay sa inahan.
Sa kasamtangan, makabalik-balik na sa pag-trabaho ang iyang amahan nga si Rodresito apan di sab pirmi.
Apan bisan pa man sa ilang kakabus, wala kini nakapugong kang Juliet nga ipadayon ang iyang pangandoy.
Aron makapadayon sa iyang pagtuon sa kolehiyo, siya misulod isip choir sa University of Mindanao nga ning bag-ohay lamang, nahimong national champion sa usa ka indigay.
Karon nga busy ang dalaga sa kauluhan, nasakripisyo una ang iyang pagtuon.
"Stop sa si Juliet sa iyang eskuwela karon kay sige man sila og practice sa Manila," pahayag sa iyang inahan.
Ang kadaugan ni Juliet sa Star of Davao niadtong 2007, mao ang nagsilbi niyang ganghaan aron nga iyang makab-ot ang iyang pangandoy.
Sukad kaniadto, nahimo na siyang paborito nga tigkanta sa mga pasundayag sa lokal nga kagamhanan sa siyudad sa Davao. Nahimo sab siyang kinaham nga jingle singer sa mga lokal nga recording studio.
Ang mga ginagmay nga kitaon ni Juliet sa maong mga "raket", nakatabang usab sa iyang pamilya.
r Wa kawad-i sa paglaum
Si Juliet, makapilang higayon na sab nga niapil sa mga contests ug bisan mga reality shows.
Nasayran nga niapil sab kini sa Pinoy Idol sa GMA kaniadto apan natagak sa uwahing mga rounds.
"Gitawag gani to siya ni Jolina (Magdangal, kanhing PI juror) nga 'parang nanay manamit,' baduy daw pero wala lang man to sa iyaha. Kabalo man siya nga part lang to sa contest. Moana pa man gani na siya kung mapildi siya nga 'ok ra na ma uy.' Di gyud na siya ma-discourage ba," sumala sa inahan niini.
Sa usa sab ka eksklusibong impormasyon nga nahagpat sa Superbalita, gitug-an sa inahan niini nga napili na sab diay isip usa ka finalist sa usa ka sikat nga reality show sa dakong network si Juliet. Nagpaabot na lamang unta diay kini kung kanus-a sugdan ang show. Apan karon nga usa na siya ka MYMP vocalist, di na niya kini maapilan.
r(Ibalik sa Ginoo)
Ang apohan ni Juliet nga si Editha Bahala, mitambag sab sa iyang apo nga di kalimtan ang Ginoo sa tanan niyang naabot karon.
"Una gyud nga pasalamatan ang Ginoo kay siya ang naghatag sa imong talent," pahayag ni Editha.
Samtang ang iyang inahan midugang, "Ang akoang ikatambag, ang iyang pag-alagad (sa Ginoo), di niya kalimtan. Manghinaut ko nga magamit ang iyang talento sa maayo lang ug dili sa dautan," pahayag sa inahan.