SI Department of Justice (DOJ) Undersecretary Ricardo Blancaflor nagklaro nga wa pasagdi sa kagamhanan ang kaso sa mga biktima sa Maguindanao massacre.
Si Blancaflor, usa sa mga bisita sa ikaduha ka bulan nga paghinumdum sa masaker sa Maguindanao nga nahitabo kaniadtong Nobyembre 23, 2009.
Matud sa opisyal nga wala sila nagpasagad sa kaso ug naninguha nga mahatagan og hustisya ang mga biktima sa mangilngig nga hitabo.
Gidugang pa niya nga wala nila gipasagdan ang mga anak sa mga gipamatay nga miyembro sa media.
Siya nagpahibawo nga naghatag sila og scholarship sa mga anak sa mga biktima.
Sa samang higayon, gibisita sab ni Presidential Adviser on Mindanao Affairs Jess Dureza ug Department of National Defense Secretary Norberto Gonzales ang mga sakop sa media sa Central Mindanao kauban si Blancaflor sa Forest Lake Cemetery sa General Santos City. Sa maong lugar gilubong ang mga biktima sa krimen.
Naghalad sab sila og pag-ampo ug bulak sa lubnganan sa laing 12 ka mga namatay. Human niini, miadto sila sa massacre site sa sitio Masalay, barangay Salman, Ampatuan, Maguindanao ug nagdagkot og kandila.
Giklaro ni Dureza nga dili muhunong ang gobyerno sa pagpaningkamot nga katagaan og hustisya ang mga biktima.
Mitambong sa panagtapok sa massacre site ang mga militanteng grupo, mga non-government organizations, religious group, pamilya sa mga biktima, Kapisanan ng mga Broadcaster ng Pilipinas Cotabato City Chapter President Edwin Fernandez, National Union of Journalists in the Philippines Cotabato Chairman John Unzon ug mga miyembro sa media sa Central Mindanao. (Edgardo Fuerzas)