DAGHAN ang miangal sa pagpangsikop sa mga tambay sa kalye sukad gipatuman ni Presidenti Duterte ang iyang direktiba ngadto sa kapolisan.
Apan, giklaro ni presidenti ngadto sa iyang mga kritiko wala niya mandoi ang kapolisan nga sikopon kining mga tambay. Sitahon lamang kini apan kon kadudahan ilang lihok, imbitahon sila ngadto sa presinto.
Unsa may dautan niining pagdili sa pag-tambay sa kalye. Unsa may dakong katarungan nga mag-tambay sa kalye, labi na panahon sa kagabhion? Makasalig ba kita niining mga tawo nga naglakwatsa sa kagabhion?
Dili baya mga hamtong lang ang naka-tambay, daghang mga minor de edad ang nagkalat sa mga karsada karon. Unsa may buot ipasabot niini, unsa may mensahi nga makita nato dinhi – duna bay pagpabaya sa mga ginikanan o imahen kini sa mga tawo nga “tapulan”.
Sa probinsiya, kon duna may tambay, tingali gamay ra kay sagad sa mga tawo tua sa iyang umahan. Dinhi lamang kini makita ang daghang tambay sa mga dakbayan.
Nakita nato ang punto ni Duterte nganong gihingusgan niya ang kampaniya batok sa mga tambay. Gawas nga kaminusan ang posibling kremin ug mapatigbabaw ang kahapsay ug kalinaw sa lugar, tingali mohugot ang relasiyon sa pamilya kon anaa sud sa panimay ang matag sakop niini ug malikayan ang daotang impluwensiya sa gawas.
Angay ba nato paminawon ang mga kritiko ni Duterte? Pila man gyud ang ihap niining mga tambay sa kadalanan batok sa mga tawo nga nagpahiluna sud sa ilang pinuy-anan. Ngil-ad na ba gyud kining direktiba sa presidenti batok sa mga tambay, parehas sa iyang pagpagukod batok sa mga tawo nga mogawas sa panimay nga maghukas way sinina.
Sa kinatibuk-an, alang sa tarong nga mga molupyo, makaayo baya kining kampaniya sa administrasiyon karon batok sa mga tambay ug kining mga maghukas sa publiko. Ug mas maayo gani, hingusgan ang pagpatuman niini sa tanang dakbayan ug munisipyo sa nasod.
Ang nakita nato nga bikil niini pagpanggukod sa tambay ug mga tawo nga maghukas sa publiko mao kining kakuwang sa gobiyerno pagpasabot sa maong programa.
Unta sa wala pa gipatuman kining kampaniya dunay sobsob nga pagpakaylap sa impormasiyon ngadto sa publiko aron masabtan nila pag-ayo ang tumong ug kaayohan.
Lisod man gud madawat sa katawhan labi na nga nahimo nang kabahin sa kultura kining pag-estambay sa gawas. Ang problema man gud karon mao nga lahi kaniadtong karaan nga panahon diin ang mga estambay nagtapok aron maglingawlingaw, magbayloay og sugilanon, manganta. Karon, misagol na kining mga daotang elemento sa katilingban diha sa mga pundok sa tambay.
Atong panid-an ang panahon samtang gipatuman kining direktiba kon aduna ba gyoy positibo nga resulta. Ihiklin una nato kining mga pagsaway ug pagsupak sa mga kritiko sa Presidenti kay bisan unsa pa ka maayo sa programa sa gobiyerno ila gyud nang supakon.