BALOR sa 15 milyones pesos ang marijuana nga nabakwi sa hiniusang puwersa sa Philippine Drug Enforcement Agency (PDEA) Region 10, 403rd Brigade sa 8th Infantry Batallion, Philippine Army ug Philippine Air Force sa Brgy. Canangaan, Cabanglasan, Bukidnon.

Malampuson nga nasulod sa mga otoridad ang duha ka ektaryang plantasyon sa marijuana nga giingong tinanom sa Front Committee 89 sa rebeldeng New People's Army (NPA) sa lugar.

Sa pakighinabi kang Colonel Jose Gelle, S7 sa 403rd Brigade, niya, pipila ka sibilyan ang mitug-an kanila nga dunay lapad nga plantasyon sa marijuana sa lugar.

Hinungdan nga milusad sila og operasyon gamit ang helicopter sa Philippine Air Force.

Apan gitin-aw ni Gelle nga wala sila'y naabtang mga rebelde pag-abot sa lugar hinungdan nga gikuhaan nila kini'g documentation aron magamit sa pagpasaka'g kaso batok sa mga suspek sa korte.

Gikatakdang sunugon sab ang nakuhang marijuana.

Apil sa gibantayan karon sa militar ug kapulisan mao ang utlanan sa North Cotabato, Bukidnon ug Davao City nga gikatahong dunay mga plantasyon sa marijuana nga gipangtanom sa mga rebelde. (Edgardo Fuerzas)