GIBANA-banaang mokantidad sa P200 mil ang mga kabtangan nga nadanyos human naugdaw ang usa ka balay didto sa Purok 18, Barangay Poblacion, lungsod sa Nabunturan, Comval Province.

Sa report gikan sa Nabunturan Fire Station nasayran nga pasado alas 3:15 sa hapon niadtong Sabado, maayong pagka-ugdaw sa panimalay nga gipanag-iyahan ni Justiniana Monforte sa dapit.

Miabot ngadto sa kapin 55 minutos ang pagpakigbugno sa mga sakop sa ka-bomberohan una nila giila nga 'fire out' ang dapit.

Nagsugod ang kalayo sa likod nga bahin sa extension sa nahisgutang balay, dayon gilamoy na niini ang kinatibuk-ang balay.

Sa inisyal nga pakisusi sa mga otoridad nasuta nga electrical short circuit ang hinungdan sa sunog.

Hinuon way gikatahong nasamdan o naangol sa sunog.

Padayon ang gihimo imbestigasyon sa mga otoridad sa hitabo.