GIKAINTAPAN siya sa mga kriminal, sa mga giingong sagbot sa katilingban. Ilabi na niadtong kusog pa kaayo ang mga vigilantes sa syudad sa Sugbo. Usa siya sa giila nga nilutos sa mga kriminal.
Usa siya ka sharpshooter. Hingigo gyud sa pagpamusil. Di sama sa estorya sa mga karaang pulis sa syudad nga dunay opisyal kaniadto nga kon makapusil og kriminal, maigo gyud sa agtang. Nanga-agtang lagi kay gidul-it man.
Pero diha say pulis nga nakapusil sa usa ka suspetsado sa pagpanulis ug naigo ang agtang sa suspetsado. Iya ra diay unta tong i-disable pinaagi sa pagpusil sa paa, pero nihupo man, naagtang hinuon.
* * *
Si SPO1 Adonis Dumpit, nga nakadawat og daghang pasidungog sa iyang paglutos sa mga kriminal, napatay sa usa ka giingong pinusilay pasado alas otso sa buntag niadtong Miyerkoles didto sa Barangay San Isidro, Tagbilaran City, Bohol.
Apan ang iyang gika-engkwentro di mga kriminal, mga sakop sa National Bureau of Investigation (NBI) ug sa Regional Intelligence Division (RID) 7. Ang mga ahente sa NBI ug sa RID 7 nisita kaniya tungod sa giingong kalambigitan sa illegal nga drugas.
Ang kaniadto nabaniog nga molutos sa mga kriminal, nahimong usa ka suspetsado. Ug ang hanas nga mogamit sa pusil, napatay pinaagi sa pusil. Live by the gun, die by the gun. Sa una, live by the sword, die by the sword, kay espada pa man ang armas.
* * *
Si manlalaban Rennan Augustus Oliva, hepe sa NBI-Bohol, niingon nga nakalitan siya sa pagkadawat sa impormasyon nga nahilambigit si Dumpit sa illegal nga drugas. Sa pagkamatay ni Dumpit, naka-recover ang mga tinugyanan sa balaod og balor P90,000 nga shabu gikan kaniya.
Si Dumpit mao ang ika-upat nga pulis sa “narco list” sa gobyerno o niadtong nalambigit sa illegal nga drugas nga napatay sa Central Visayas sud sa 18 ka adlaw. Mao ba kini ang gitawag nga “internal cleansing” sa kapulisan?
Molutaw ning pipila ka mga adlaw kon unsa gyud ang lintunganay sa kalambigitan ni Dumpit sa illegal nga drugs. Mahibaw-an unya nato kon ngano nga ang usa ka “super cop” nahimong usa ka “narco cop.”