UPAT pa ka Kagay-anong chessplayers ang nihatag pa og medalya sa 19th ASEAN Age Group Chess Championships rapid event niadtong Martes didto sa The Royal Mandaya Hotel sa Davao City.
Nakabitbit og duha ka gold si Mary Joy Tan, kinsa lumad sa Jasaan, Misamis Oriental ug gisuportahan sa Cagayan de Oro, sa 16-under girls individual ug rapid category.
Nakuha sa 15-anyos nga Tan ang usa ka gold sa 16U individual rapid agi sa three-way tie sa first place uban sa iyang RP Age Group teammates nga sila Kylen Joy Mordido ug Jarel Renz Lacamba nga adunay 5.5 puntos matag usa.
Sa maong resulta nila, gidominar nila ang team event agi pagkolekta og 16.5 puntos tanan-tanan ug upat ka puntos ang biya sa nagsunod nga Vietnam Team.
Mao sab ni ang naabot ni Ronald Canino nga nidala og duha ka gold sa 16-under boys open individual ug team classical standard event niagi.
Sa pikas bahin, nilangkat si National Master Levi Mercado og bronze medal sa 50-above men’s individual rapid event.
“Sayang akong mga pilde kay pulos winning,” ingon ni Mercado.
Nakakuha sab og silver sila Lawrence Raphael Lawan ug Maria Theresa Lumancas sa team event pagrepresentar nila sa Pilipinas sa 8-under open ug girls, sunodsunod.
Naa pa’y tsansa ang tibook pambato sa Cagayan de Oro molangkat og medalya sa blitz, diin maoy kataposang event nga gipahigayon sa ning pagsulat kagahapon.