GIKAN sa usa ka byahe gawas sa dakbayan, nagdali ko nga makatan-aw sa pelikulang horror nga akong gidumtan, ang Cry No Fear. Naunsa ba nga wala man sa mga sinehan. Bag-o pa gani gisugdan pagpasalida.
Wa kaha nadayon og salida? Sus, kay kadiyot ra man diay ni gisalida ug gitangtang sab dayon. Paet!
* * *
Nakadalikyat kog tan-aw sa It’s Showtime karong semanaha ug maoy akong nataymingan ang pagsulod ni Dulce sa Tawag Ng Tanghalan sa Showtime isip hurado.
Gipailaila siya pinaagi sa trio diin gikauban niya ang duha ka mga grand champions sa maong bangga sa awit, si Noven Belleza ug si Janine Berdin. Nalingaw ko sa maong numero diin nagtigi ang mga biritero.
Hinoon, isip hurado, wa pa gyud ko makalugar og tan-aw ni Dulce. Asa ra man gyud na ba?
* * *
Mga pahalipay ngadto sa Convergys sa usa ka malamposon nga pagsaulog sa tinuig nilang kalihukan di pa lang dugay nga gitawag og YOUnified Hugyaw nga kaunom na gipahigayon.
Giablihan kini sa parada nga giapilan sa walo ka mga Convergys sites ug didto motapos sa University of Southern Philippines Foundation – Lahug Campus. Gisundan kini sa mga kalihukan sama sa championship sa basketball ug volleyball, bangga sa mga sakop sa pamilya sa mga kawani, battle of the bands, song and dance competition ug pasundayag sa mga bosing sa kompaniya.
Ang Cebu Arcenas-Banawa site ang nahukmang kampyon sa tanang mga kalihukan. Ang inilang banda nga Itchyworms nitokar sa ilang mga hit songs isip panapos sa tibuok adlaw nga kalihukan.
* * *
Human sa taastaas nga panahon nga wa makita si Kris Aquino sa telebisyon ug sa lapad nga telon sa mga sinehan, mobalik siya uban ang usa sa mga labing gikagubtan nga batan-ong loveteam, ang JohsLia nila ni Joshua Garcia ug Julia Barretto.
Kini pinaagi sa labing ulahing dalit sa Star Cinema, ang I Love You, Hater. Matud sa mga hungihong, daghang kilig moments ang maong pelikula nga gidirihir ni Giselle Andres.
Atong masuta unsa gyud kining gitawag og JoshLia kilig inig salida na sa I Love You, Hater unya sa Hulyo 11. Ato usab nga masuta kon may makilig ba usab kang Kris ug kon ang iyang papel makapadugang ba sa kilig factor sa JoshLia.
* * *
Wa koy palabyon sa mga pahinumdom o commercial, ma-telebisyon man o ma-radyo. Ambot, ganahan lang gyud ko motan-aw o maminaw kon unsay nindot o bati nga pahinumdom.
Duna koy wa mauyoni karong bag-o. Kining pahinumdom sa usa ka herbal nga produkto nga nagkanayon: “Pag mopalit...”. Unsay “Pag” ba oi? “Kon” tingali kay Binisaya baya ang pahinumdom.
Visayan Grammar 101 mo dihaaa!