GAWAS kang Ella Grace Moulic nga nahimong Woman Fide master (WFM), mihatag na sab og dungog sa siyudad ug nasud si Irish Yngayo nga mibulsa og titulo sa Women Candidate Master (WCM) 19tj Asean Age-Group Chess Championships didto sa The Royal Mandaya Hotel.

Ang estudyante sa University of Mindanao (UM) malampusong nasungkit ang maong titulo human naka-bronze sa standard event.

Ang 15 anyos nakapuwesto sa ikatulo sa girls 16 event sa nine-round Swiss System Format competition human mitala og 6.5 puntos.

Nagpasalamat si Yngayo kang lawyer Jong Guevarra, kinsa nakigtigi sa seniors event, sa pagsuporta sa iyang rehistrasyon.

"Happy and thankful kaayo ko. Dili man gyud unta ko makadula kay wala ko naka-qualify sa Mindanao leg pero gitabangan ko ni Attorney Jong na makadula. Iyahang gihatag sa akoa ang slot na para unta sa iyahang anak mao naningkamot jud ko ug maayo para mabalusan nako tanan nag tabang sa akoa," niya pa.

Kini ang unang WCM ni Yngayo sulod sa pito ka tuig dihang nagsugod siya duwa sa girls eight years old division.

Bahin kang Moulic, wa siya magdahom nga makuha niya ang titulo ilabi na daghan siya og bug-at nga kalaban sa torneyo.

"It's not expected kay may apat na WFM tapos nag-concentrate talaga ako ngayon kasi last ko na ito para maka-title," pahayag sa 19 anyos atol sa Davao Sportswriter Association (DSA) Forum didto sa The Annex 2nd floor SM City Davao kagahapong adlawa.

Si Moulic una nakabulawan sa girls 20 division team ug nakaplata sa girls 20 standard individual.

Nanghinaut ang 3rd year student sa De La Salle University nga makaduwa pa og laing internasyonal kompetisyon aron makakuha pa og laing titulo, "sana good performance sa UAAP and may international pa."

Nagpasalamat sab siya sa iyang Coach Randy Segarra sa pagsuporta kaniya, "Thank you kang Coach kasi siya nag-prepare sa akin."