BAG-ONG drug player si SPO1 Adonis Dumpit hinungdan nga wa siya sa drug watchlist sa kapulisan.
Nahibaw-an lang ang giingong iyang kalambigitan sa illegal drugs human mosumbong ang usa ka pulis ug asawa sa giingong pagpanghilabot ni Dumpit sa usa ka kaso ug siya ang gidudahan nga nanghasi.
Gawas niini, nahibaw-an sa National Bureau of Investigation (NBI) Bohol Province ug sa kapulisan nga ang kapuyo ni Dumpit asawa diay sa usa ka drug lord nga nabilanggo sa Leyte Regional Prison sa Abuyog, Southern Leyte.
Duna nay mga higayon nga si Dumpit mosuway sa pagpatunga kon dunay madakpan nga drug pusher.
Si Dumpit nabilanggo sa Abuyog sa kasong homicide niadtong 2015, apan nakagawas niadtong 2016 human makapiyansa pinaagi sa tabang ni Cebu City Mayor Tomas Osmeña.
Si Osmeña nisaad nga iyang buhion ang dignidad ni Dumpit, kinsa iyang gihulagway nga maayong tawo ug pulis.
Usa ka opisyal sa Police Regional Office (PRO 7) nga nihangyo nga di una magpahingan nagkanayon nga bag-ohay lang nila nasayran nga protektor sa usa ka drug personality sa Bohol si Dumpit human gireklamo sa asawa sa usa ka pulis nga gipaarakan ang ilang sakyanan niadtong Hunyo 13.
Ang ngan sa asawa ug bana sa pulis gipugngan ning mantalaan.
“Wala siya sa lista kasi newly identified man siya. Pero protector siya. Yan ang maliwanag. Di ba naa siyay gihulga nga nag execute og affidavit sa NBI?” matod sa police official.
Matod sa asawa nga nipadala kini og text message sa iyang bana nga na-assign sa usa ka special unit sa Bohol Provincial Police Office aron pa us-usan ang ang kaso sa ilang dinakpan sa buy bust operation niadtong Mayo 25, 2018 nga si Sergio Tahanlangit, silingan ni Dumpit sa Barangay San Isidro.
Apan gibalibaran si Dumpit sa nakadakop nga pulis nga nagranggo og PO3 kay di siya makahimo niini, gawas kon si Dumpit na ang mohangyo sa ilang labaw.
Giingong nasuko si Dumpit ug nianang pagka alas 6 sa gabii sa Hunyo 13, girapido ang ilang sakyanan nga mimugna og grabeng kahadlok sa asawa lakip na sa bana nga pulis.
Tungod kay si Dumpit ang ilang gidudahan nga naghimo, nidangop ang maong pulis lakip na ang asawa niini sa NBI aron ireklamo ang gihimo sa kontrobersyal nga pulis.
Sinugdanan
Ang pangu sa NBI Bohol provincial office nga si Renan Oliva nitug-an sa Superbalita Cebu nga nagsugod ang pagkalambigit ni Dumpit sa illegal drugs sa dihang nabilanggo siya sa Abuyog, Southern Leyte.
Si Oliva nidugang nga niadtong 2015, sa dihang bag-o pa siya nadestino sa Bohol NBI, aduna silay nangadakpan nga drug personalities ug dunay higayon nga nanawag niya si Dumpit ug nipahibawo nga ang usa sa ilang dinakpan asset niya ni Dumpit.
Apan iya matod pa kining gibalibaran ug giawhag nga mokuha og abogado aron maoy molaban sa dinakpan.
Giingon nga ang bana sa kapuyo ni Dumpit nga si Maria Ella Amores nabilanggo sa Abuyog nga giilang drug lord sa Eastern Visayas nga linya, matod pa, ni Kerwin Espinoza.
Dinhi na natakdo sa kapulisan ug sa NBI nga si Dumpit usa ka narco cop tungod sa ilang connection.
Duterte
Human masayod sa kamatayon ni Dumpit, si Presidente Rodrigo Duterte nga niduaw sa Bohol kagahapon, niingon nga mao kini ang padulngan sa mga pulis nga malambigit sa illegal drugs.
“Mabuti dito na lang sya tinapos. Kung narco-politics yan, tapos rin sya doon (Davao). Eh, sinabi ko na, p***** i** nyo, leche, hwag kayong pumasok dyan. Lahat kayo na pulis, yan kagaya nyan, pag pumasok kayo, hwag kayong magtaka kung mamatay kayong mga p***** i** ninyo. Sinabi ko na sa inyo umalis kayo dyan,” matod ni Duterte.
Bisan pa sa ilang nasayran gikan sa mga awtoridad, ganahan si Mayor Osmeña nga ibalik ang dignidad ni Dumpit ug ipaambit ngadto sa mga Sugboanon kon unsa kini ka maayo nga pulis kaniadto.
“All I want to do is make his dreams come true, which is to give him back his dignity. I’ll just give him a nice burial,” sigon pa ni Osmeña.
Pahayag niya nga angay mohatag og respeto ang mga tawo kang Dumpit kay maayo kini nga tawo ug pulis.
“I want the Cebuanos to show respect for him because without him, criminality was out of control....He’s really my best policeman,” dugang pa sa mayor.
Saysay pa ni Osmeña nga grabe ang kasubo nga nasinati sa ilang panimalay apil na ang mga katabang, driver ug guard kay ila na kining giisip nga miyembro sa ilang pamilya.
Si Osmeña ang nipiyansa og P250,000 kang Dumpit hinungdan nga nakagawas sa bilanggoan ug nabalik dinhi sa Sugbo sakay sa usa ka pribadong abyon.
Bisan si Dumpit dako kaayog pasalamat kang Osmeña kay wa siya pasagdi niini.
Gibutyag sab niya nga hatagan niya kini og maayo nga paglubong ug mobisita siya kada adlaw sa haya niini.
Sa miaging adlaw, si Osmeña nagkanayon nga mohatag siya og tabang pinansiyal sa pamilya alang sa mga gastuhan sa lubong ni Dumpit.
Hadlok
Samtang mga pulis nga mga suod ni gikataho nga mahadlok nga moduaw sa iyang haya kay basin dunay naniid.
Si Cebu City Councilor Dave Tumulak niingon nga daghang police officers ang nipadangat sa pahasubo, apan nagpanaganang moadto sa haya.
“Daghan ang niingon nga gusto sila motan-aw, mobisita. Mahadlok lang sila naay maniid ug basig pasanginlan na pud sila,” siya niingon.
Apan iyang gipaneguro nga basta wa lang sila malambigit sa illegal drugs, wa silay angay nga kahadlukan.
“To all policemen in Cebu City especially the friends of Dumpit, they have nothing to be afraid of. As long as wa lang ta malambigit og drugas, di ka angay mahadlok nga moari ka. Pakita nimo as a friend nga di sila angay mahadlok kay kanang mga taw, kon duna man gani’y maniid mag double check pud siguro nas information ug di na magpataka siguro kay they themselves, they are also police,” si Tumulak. (AYB, JOB, Christine Joyce Secuya-CNU Comm Intern)