DUHA ka mga hubog nga dunay armas ang gisikop sa kapulisan sa alas 2:00 sa hapon niadtong Sabado didto sa Barangay Agdao Centro, siyudad sa Davao.
Nasikop mao sila Diosdado Amores, 45, minyo, nagpuyo sa Blk. 2, Sta. Cruz, Tancontian Street, Barangay Agdao Proper ug Noel Bustamante, 27, minyo, nagpuyo sa South Bay, Lanang.
Sila Amores ug Bustamante gisikop sa kapulisan human sila nasiplatan nga nanghasi didto sa maong dapit ug nagbit-bit og armas.
Ang gihimo sa duha gipahibalo dayon sa mga molupyo sa maong lugar ngadto kang Kapitan Rene Estorpe kinsa maoy nangayo og police assistance sa Central 911.
Mga sakop sa Mobile 16 nga gipangulohan ni Police Officer 2 Milo Mise ug Police Officer 2 Ely Dela Cruz maoy miresponde sa maong lugar ug didto ilang gisikop ang mga suspetsado.
Nakuha gikan kang Amores ang usa ka .357 revolver nga dunay serial number 080166 ug unom ka mga buhing bala ug nasakmit sab kang Bustamante ang usa ka homemade revolver nga dunay serial number 052262 ug unom ka mga buhing bala.
Giingon nga nag-inom ang duha sa maong lugar apan dunay laing mga tawo nga ilang gikabikil mao nga nagbit-bit sila og armas.
Ang duha, tungod sa kahubog, wala na masayud sa ilang gihimo ug gipanghimakak nga ila ang mga armas nga nasakmit sa kapulisan dihang gihinabi sa Superbalita kagahapon didto sa selda sa Davao City Police Office.
Giandam na sa kapulisan ang kasong paglapas sa Republic Act 8294 kun illegal possession of firearms aron ipasaka ngadto sa korte. (AD)