UPAT ka mga tawo nga naghupot og mga pinaugang dahon sa marijuana ang nasikop sa kapulisan sa managlahing lugar dinhi sa siyudad sa Davao niadtong Sabado.

Nasikop sa alas 3:55 sa hapon mao si Edison Obeso, hamtong ang pangidaron, minyo, construction worker, nagpuyo sa # 1297, Blk. 92, Barangay 21-C Poblacion.

Si Obeso gisikop sa kapulisan nga gipangulohan ni Police Senior Inspector Ranulfo Caba¤og, hepe sa Sta. Ana Police Station.

Ang tuyo sa kapulisan mao ang pagsikop kaniya pinaagi sa gahum sa warrant of arrest nga dunay criminal case number 849-07 sa kasong frustrated murder nga gipaguwa ni Judge Isaac Robillo Jr. sa Regional Trial Court Branch 11.

Samtang giposasan sa kapulisan ang suspetsado, nasiplatan nila ang usa ka butang nga giputos og papel ug dihang sisusi, mga pinaugang dahon sa marijuana.

Nasikop sab sa alas 8:30 sa gabii mao si Ian Vincent Isidra, 20, assistant magician, nagpuyo sa Iwha Village, Barangay Dumoy.

Si Isidra nasikop sa mga gwardiya sa People's Park human siya gikapkapan ug nakuha kaniya ang mga pinaugang dahon sa marijuana.

Alas 10:45 sa gabii nasikop sab sa kapulisan si Roque Lanaza, alyas Panoy, 35, minyo, lumad nga taga Cateel, Davao Oriental ug nagpuyo sa Kilometro 23, Purok 1, Barangay Bunawan.

Si Lanaza gisikop sa mga otoridad pinaagi sa buy-bust operation didto sa Tibungco Public Market.

Unang sabot sa suspetsado ug sa nagtakuban nga pulis nga didto sila magkita sa dalang R. Castillo apan nausab kini ug nagkasabot nga didto magktia sa Tibungco.

Nakuha gikan kaniya ang duka ka kilong mga pinaugang dahon sa marijuana atol sa buy-bust operation.

Kasong paglapas sa Republic Act 9165 kun Dangerous Drugs Act of 2002 ang atubangon karon sa mga suspetsado ngadto sa korte.(AD)