USA ka lalaki nagmaneho sa iyang motorsiklo, diha-dihang namatay human aksidenteng nipasok sa usa ka 10-wheeler truck nga nakaparada kilid sa Davao-Cotabato national highway didto sa Km. 77, lungsod sa Bansalan, Davao del Sur.
Ang biktima sakay sa iyang motorsiklo nga Skygo, nagbaton sa plakang MJ 7841 mga ala 1:30 sa kaadlawon, kagahapong adlawa.
Ang 10-wheeler Isuzu truck (wing van), nagbaton sa plakang RBJ 682, gipanag-iyahan ni Joseph Cadulong ug gimaneho ni Arnold Mencias, 37, minyo ug taga Libungan, North Cotabato.
Nipasok ang motorsiklo sa ilawom sa maong trak nga nag-hazard light lamang ug wala nipadaplin gikan sa sementadong bahin sa karsada.
Gideklarar nga namatay gilayon ang biktimang si Betheliano Cabatas, 54, minyo ug molupyo sa Barangay Poblacion Uno, Bansalan.
Base sa inisyal nga imbestigasyon ni Inspector Reniel Raotraot, ang deputy chief of police sa lugar, sad-an matod pa ang drayber sa 10-wheeler sanglit wa kini nagbutang og "early warning device" samtang gi-ayo ang iyang sakyanan.
"Wala man gud siya nikanaog sa shouldering unya nag-hazard lang," niya pa sa pakighinabi sa Sun. Star Superbalita.
Matod ni Raotraot nga hayan kusog sab kaayo ang dagan sa motor ug wa na kini makabantay sa maong trak.
"Murag hubog siguro ang drayber (motor) kay wala gani skid mark, timailhan nga nag-apply siya og brake mao to maayong pagkapasok sa ilawom sa truk," dason ni Raotraot.
Sigun sa imbestigasyon nga sa walang bahin sa lubot sa truk unang nibangga ang motorsiklo ug nilahos na kini sa ilawom nga bahin hinungdan nga maayong pagkahiagom og mga bun-og ug samad sa biktima kinsa natibway dayon niadtong higayona.
Boluntaryong gitahan sa drayber sa 10-wheeler ang iyang kaugalingon ngadto sa kapulisan mao nga karong adlawa atubangan niini ngadto sa piskalya ang kasong "reckless imprudence resulting to homicide." (Orlando B. Dinoy)