PATAY na nga nahidangat sa tambalanan ang usa ka amahan samtang angol ang asawa ug anak human nga nibangga ang gisakyang motorsiklo mga alas 9 sa gabii niadtong Biyernes sa Gokingville, Bulua, dakbayan sa Cagayan de Oro.
Patay si Jesmar Saren, 39, minyo samtang angol usab ang mag-inahan nga sila si Marjorie Saren, 35 ug Zyrelle Saren, 12 kinsa pulos residente sa Zone-2, Bulua.
Sa impormasiyon nga nahipos gikan sa kapulisan sa Police Station 7 (PS7) sa Bulua, gikabutyag nga gimaneho ni Jesmar ang motorsiklo nga Honda XRM diin wala kini numero sa plaka nga dala kauban ang asawa ug anak nga angkas apan sa pag-abot na sa maong dapit aksidente kini nga nibangga sa laing motorsiklo.
Gikabutyag nga samtang gibaybay niini ang kadalanan sa Zone-9, Bulua apan sa pag-abot na sa maong dapit misulay kini sa pag-overtake sa gauna nga laing XRM nga gimaneho ni Magdalena de Guzman, 39 ug residente sa Anhawon, Bulua apan napunggitan niini hinungdan sa aksidente.
Nakaangkon og mga samad si de Guzman hinungdan nga gidala kini sa City hospital ug mga alas 3 sa kaadlawon kagahapon boluntaryo kini nga mitahan sa kapulisan.
Sa pagsulat niini nga balita, kasamtangang anaa si de Guzman sa Maharlika Detention Cell.