ABHAK ang likod sa usa ka asawa human gitigbas sa bana gabii sa adlawng Martes, Nobiyembre 26, sa Barangay Sankanan, Manolo Fortich, Bukidnon.
Giila ang biktima nga mao si Cleofe Gayramara, 53, residente sa dapit.
Gitumbok nga suspetsado mao si Ulysses Gayramara, 42.
Ang magtiayon pulos nagtrabaho sa plantasyon sa dapit isip mga harvester.
Sa inisyal nga imbestigasyon sa kapolisan sa Manolo Fortich nasuta nga nagpreparar sa ilang panihapon niadtong tungora si Cleofe.
Nakurat na lamang kini dihang kalit nga gitigbas sa iyang bana ang iyang likod.
Selos ang gituohang rason nga nahimo sa bana kinsa boluntaryo nga mitahan sa kapolisan.
Ang asawa napabili nga nagpaalim sa iyang samad nga naangkon sulod sa tambalanan.