DAGHANG wa magdahom nga balibaran ni Nena ang tanyag nga magpakasal sila sa iyang lima na ka tuig nga uyab, nga si Albert (mga tinuod ngalan gitago) kay suod naman sila kaayo sama sa bodbod ka pilit ug murag gihulmigas sa katam-is.
Makaguol ang ending sa ilang relasyon apan sa dihang nag-inusara na si Nena, bukas niyang gipasabot iyang desisyon, bisag sakit sa iyang buot, kay matod pa niya di ‘marrying type’ ug di pa andam si Albert mahimong bana ug amahan sa ilang uma-abot nga anak.
Di nako siya mamahay kay para nako insakto man sab iyang mga rason ug desisyon nga gibarugan para sa iyang gipangita nga forever, sama ini:
Lalaki nga di mahadlok mo atubang ug andam mangita og pa-agi pagsulbad sa mga problema ug isyu labi na kung mohapak ang bagyo sa kinabuhi nga magdala og daghang pagsuway.
Nagpalayo sab siya niadtong dunay kina-iya nga di makaon sama sa pagka-hakog, dalo, talawan, bakakon, tamaran, way pagtagad sa uban ug hambogero.
Sunod ang pagka ‘Mama’s Boy’, grabing pagka-dependent ug pilit sa inahan. Kanunay kining magpa silbe ala hari o senyorito kay magpaluto, magpalabada, magpa-hinlo, magpa-hatod, ug uban pa. Iyang pagtan-aw sa iyang girlfriend puli sa iyang mama, o kaha maid o yaya. Ang gipangita ni Nena independenti nga uyab nga mabuhi ra bisag nag-inusara ug maka-atiman sa kaugalingon.
Nangita sab siya og pares nga di magduha-duha og talikod, andam maminaw og mo suporta sa iyang kawsa, huna-huna, pulong ug responsibilidad bisag unsa pa ka dako o seryuso sa mga sayop nga iyang nadiskarilan, di murag puppet nga magsegi og tando. Kini nga kina-iya magpakita sa pagkamatinud-anon sama sa kanunay litukon kung dunay kaslon ‘for better or poorer, in sickness and in health, til death do us part’.
Ang kanunay paggamit sa sentido kumon una mo lukso inig desisyon importanti sab kaayo.
Balik-balik nga pahimangno sa among inahan namong upat ka manag-igsoon ‘head over hills’ gayod, unahon pag-gamit ang ulo dili ang tiil una molukso sa kaminyuon.