TAGBILARAN CITY, BOHOL--Giaprobahan sa Regional Development Council (RDC) sa Central Visayas ang pagtukod og Metro Cebu Traffic and Transport Management Council atol sa ikaduhang full council meeting kagahapon sa buntag sa Bohol Tropics Resort.
Apil sa giaprobahan sa RDC 7 ang lima ka mga proyekto nga giila sa pasiuna nga pagtuon nga prayoridad ubos sa Master Plan Study and Institutional Development Urban Transport System sa Metro Cebu nga gihimo sa Japan International Cooperation Agency (JICA) sa pakigtambayayong sa Department of Transportation.
Kini mao ang Mandaue-Lapu-Lapu Link Bridge with Mandaue Scenic Coastal Road, Metro Cebu Circumferential Road (Metro Cebu Ring Road), Urban Mass Rapid Transit Coastal Line, UMRT Central Line ug Area Traffic Control (ATC) System.
Lakip usab sa giaprobahan sa RDC 7, ang P50 milyones nga port development sa lungsod sa Compostela, amihanang Sugbo.
Sumala ni Kenneth Cobonpue, chairman sa RDC 7, ang MCTTMC maoy motan-aw sa transport ug traffic council sa tanang local government units sa Metro Cebu susama sa Metropolitan Manila Development Authority (MMDA).
Matod niya, tukoron ang MCTTMC pinaagi sa executive order ni Presidente Rodrigo Duterte.
Siya nanghinaot nga mopaluyo niini si Cebu City Mayor Tomas Osmeña.
“Kitang tanan, for all of us. I hope he supports it,” dugang ni Cobonpue.
Siya namahayag nga kinahanglan ni kay sama sa suliran sa trapiko, dili lang usa ka LGU ang maapektuhan kondili ang tanang kasikbit niini.
Si Glenn Anthony Soco, chairman sa Infrastructure Development Committee sa RDC 7, niingon nga ang pagtukod sa MCTTMC nagagumikan sa pamahayag ni Duterte sa katapusang pagbisita niini sa Sugbo, nga gitahasan ang DOTr sa pag-oversee ug pag-takeover sa pagdumala sa mass traffic ug transport system sa Metro Cebu.
“Traffic will not be solved by one LGU, it expands to include other LGUs,” dugang niya.
Matod ni Soco, base sa pagtuon hangtod sa Mayo 2018 ang kombinasyon sa road network improvement ug pagtukod og Urban Mass Rapid Transit System girekomendar sa Jica nga maka-mitigate sa kahuot sa trapiko sa Metro Cebu.
Siya nidugang nga kini nga mga proyekto kay gi-endorse sa Lapu-Lapu City Development Council ug nila ni Mandaue City Mayor Gabriel Luis Quisumbing ug Gob. Hilario Davide III pinaagi sa suwat nga gipaabot ngadto sa DOTr ug DPWH sa kaulohan.
Atol sa tigom niadtong Hunyo 1, nipalabang og resolusyon ang IDC-RDC 7 nga nagrekomendar sa full council sa RDC 7 nga aprobahan ang lima ka priority projects ug hangyuon ang DOTr ug Department of Public Works and Highways nga iapil kini sa ilang priority investment programs aron mapahigayon ang feasibility study ug mapundohan ubos sa General Appropriations Act sa 2019. (SCG)