MULTI awarded nga hepe sa Cebu City Police Office Sr. Supt. Joel Doria hulipan na sa katungdanan sugod sa Lunes.
Ang mohulip kaniya ang kasamtangan nga regional chief sa Criminal Investigation and Detection Group (CIDG 7) Sr. Supt. Royina Garma.
Si Garma ang labing unang babaye nga molingkod isip direktor sa kapulisan sa syudad sa Sugbo.
Matod ni Police Regional Office (PRO) 7 Director Chief Supt. Debold Sinas nga kon siya lang unta ang pabut-on, di niya hulipan si Doria tungod sa maayong performance niini sa dakbayan sa Sugbo, apan misalig usab siya kang Garma.
“Kaila na mo kinsa ang mo palit? Si Sr. Supt. Royina Garma. Okay pud to siya kaila ko niya. Fighter pud nang bayhana,” matod ni Sinas.
Si Doria napiling best senior police officer sa Metrobank Foundation niadtong milabayng tuig tungod sa iyang talagsaon nga programa nga naila sa tibuok PNP organization nga mao ang Oplan Pokemon.
Ning bag-o lang, gipasidunggan usab sila sa PNP tungod sa kalamposan sa kampanya batok sa illegal nga drugas.
Nakadayeg ang buhatan sa Drug Enforcement Group sa Camp Crame sa labok sa CCPO sa ilang gubat batok drugas diin matag semana makadakop silag kapin sa usa ka gatos ka drug personalities.
Lisod tupngan
Gihulagway ni Mayor Tomas Osmeña nga lisod tupngan o malabwan ang performance ni Doria.
Gipasabot ni Osmeña moabot nag P400 milyones kapin nga kantidad sa shabu ug gatusan ka mga tawo ang nasakop sa anti drug operation ubos sa liderato ni Doria.
“I don’t want to stop his career path. He is the best, layo kaayo (itandi sa uban). We work very well together. He catches even the small pusher like he has a fishing net no by the thousand, I’m not exaggerating,” paghulagway ni Osmeña. (AYB, PAC)