Gikan sa court hearing gipatay

Gisakyan. Mao kini ang multicab nga gisakyan nila ni Fidel Ybañez, 27, iyang inahan ug igsuon dihang siya gipusil patay sa duha ka tawo nga nag-angkasay sa usa ka itom nga scooter. Ang dapit duol ra sa police station. (Flor V. Querubin)
Gisakyan. Mao kini ang multicab nga gisakyan nila ni Fidel Ybañez, 27, iyang inahan ug igsuon dihang siya gipusil patay sa duha ka tawo nga nag-angkasay sa usa ka itom nga scooter. Ang dapit duol ra sa police station. (Flor V. Querubin)

GIKAN nitambong og court hearing sa Lapu-Lapu City Hall of Justice ang 27 anyos nga trabahante og upholstery nga gipusil patay sa riding in tandem samtang sakay sa de pasaheroan nga multicab aron unta mopauli kagahapon sa buntag.

Wa madakpi ang mga killer bisan kon ang dapit nga nahitaboan mga 20 metros ang gilay-on gikan sa Police Station.

Giila ni P03 Marven Saraum, Homicide investigator ang biktima nga si Fidel Daitol Ybañez, taga Zone 3, Barangay Buaya, Lapu-Lapu City, kinsa nag-atubang og kasong illegal drugs.

Niadto siya sa korte uban sa iyang inahan nga si Marian ug manghod babaye.

Ang banayng Ybañez sakay sa multicab nga gimaneho ni Hiven Cabilin uban sa laing 10 ka mga pasahero nga nagsubay sa M.L. Quezon Highway.

Igo nga natungod atbang sa Pusok Elementary School, gipusil si Ybañez tumong sa ulo.

“Paghunong sa multicab kay stop (traffic light) man, gisabayan dayon sa kadtong nagmotorsiklo,” pamahayag ni Saraum.

Nanglayat ang mga pasahero agi sa bintana sa sakyanan sa dihang human sa pagpamusil, naligdas na sa sawog si Ybañez nga nagkadugo.

Nagminatay sa paghilak si Marian nga nagsapwang sa iyang anak nga unconscious na niadtong higayona.

Samtang ang mamumuno nga luwan sa itom nga scooter ug nag-jacket og itom with helmet nisutoy sa pagpadagan paingon sa MEPZ1 igo sa pag-go sa traffic light.

Gidala sa Lapu-Lapu City Hospital ang biktima apan gideklarar nga dead-on-arrival.

Atol niining pagsuwat, padayon nga nihimo og follow up investigation ang homicide section ilabi na ang pagsuta sa motibo sa pagpatay lakip na ang pag-ila sa mamumuno ingon man ang pagsusi sa CCTV camera sa dapit

Di kini unang higayon nga dunay tawo nga gipatay gikan nga nitambong og hearing.

Niadtong Mayor, usa ka lalake nga gikan usab sa hearing sa korte gipusil patay sa may ML Quezon Avenue Highway, Barangay Pajo.

Nagmaneho sa motorsiklo si Jose Tuquib Zabate, 33, taga Barangay Ibo, dihang gipusil usab siya sa riding in tandem gihapon.

Ang iyang kaso may kalabutan usab sa drugas.

Niadtong Pebrero, si manlalaban Jonah John Ungab gipusil patay usab sa wa mailhing mamumuno samtang nagmaneho sa iyang sakyanan.

Si Ungab gikan sa court hearing sa iyang kliyente nga si Kerwin Espinosa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph