KARONG Lunes, atol sa paglusad sa selebrasyon sa ika-44 nga Nutrition Month, usa ka hiniusang food gardening project ang pagahimuon sa National Nutrition Council (NNC) 7.
Sa Pick and Pay, Barangay Subangdaku, Mandaue City pagahimuon sa Regional Nutrition Committee ang pormal nga launching sa pagpananom og prutas ug utanon.
Ang tigpamaba sa NNC 7 Norre Jean Delos Santos niawhag sa publiko nga modungan kini sa hiniusa nga food gardening sa tagsa-tagsa niini ka mga tugkaran sa panimalay o sa bisan asa nga aduna’y lugar nga matamnan og prutas ug utanon.
Tumong sa maong kalihokan nga makat-on ang tagsa-tagsa ka mga pamilya sa panimalay nga mananom sa tugkaran niini aron ang utanon nga kan-on niini makuha ra sa ilang tugkaran.
Atol sa launching karong Lunes, dili lang urban gardening ang pagahimuon apan lakip na usab ang cooking demonstration gamit ang mga nakuha nga abot sa garden.
Katambayayong sa NNC 7 ang Mandaue City Nutrition Committee ug ang Subangdaku Barangay Nutrition Committee.
Si Melquiades Ibarra sa iyang bahin, tigpamaba usab sa Department of Agriculture nagkanayon nga libre nga gipang-apud-apod nila ang vegetable seedlings sa mga nagkadaiyang local government units.
Dugang niini nga mamahimo nga mangayo sa tagsa-tagsa ka munisipyo o kaha sa barangay.
Apan kon wala na, mamahimo nga mo request sa ilahang regional office aron mahatagan sa libre nga liso nga matanom sa nagkadaiyang tugkaran sa mga panimalay.
Ang Nutrition Month saulugon matag Hulyo. (HBL)