(Pasiuna: Kini ang atong apas sumpay sa suliran nga gipadangat kanato ni Boy T. of Tigato, Buhangin, Davao City mahitungod sa iyang pangutana mahitungod sa medical marijuana.)
Dear Boy T. Of Tigatto,
UG KARON sa atong pagpadayon sa pagtubag nato sa imong pangutana aning maong isyu, niingon kita nga maskin pa man og nakit-an sa mga pagtuon nga makatabang kining
marjuana sa ubang mga sakit, apan, ang problema kay ang paggamit sa marijuana isip
medisina dili alang sa tanan.
Ang nakit-an sa mga eksperto nga gitaho sa European Academy nga dili maayo niining maong marijuana mao ang mosunod:
1. Mamahimo nga mas ma-aksidente ka kung naga-drive ka.
Naaaa, unsaon man nang nawala ang imong sakit nga gibati, apan, nabangga naman hinuon ka? Maayo na lang siguro mag antus ko sa kasakit kaysa ma aksidente na hinuon, mas duol gyud tawon ta ana sa menteryo ba.
2. Makapa usbaw sa kahigayuna nga masobrahan ang dosis sa marijuana nga wala damha, ilabi na sa mga bata.
Daghan na kaha nahitabo niini sa mga lugar didto sa Estados Unidos nga kung diin legal ang paggamit niining marijuana, isip medisina. Ang problema kay daghan sa mga na overdose, tigok. Unsaon man nang naayo ang sakit sa lawas, apan, natigok naman hinuon?
3. Mosangpot sa mas makanunayon nga bronkitis kung isigarilyo ug kanunay.
Mao na ni, mawala lagi ang sakit, pulihan man sad ug sige sige nga ubo ubo. Mao gihapon kwentaha ba, hasol lang gihapon.
4. Makapausbaw sa kahigayunan nga maliso ang utok, kung dili man, depresyon ang dangatan.
Mao na ni, mawala lagi ang sakit sa lawas, nalisoan man sad ug utok. Maayo pa siguro nga mag-antus na lang sa sakit kaysa magsuroy-suroy ug maglatagaw sa dalan, kay naa nay laing kalibutan. Maayo lang og magsuroy-suroy lang, ang problema kung maghubo o magdala dala og mga sagbot. Maayo pa siguro og mag-antus na lang ko sa sakit sa migraine nako, kaysa mawad-an na ko og saktong pangisip. Mawala gyud tawon nako ang tanan sa ako nianang sitwasyona.
Kadaghan na sa mga pasyente nga akong nakit-an nga mga guapo ug guapa, nangapangit tungod kay naliso ang utok niining maong drugaha. Perteng sayanga sa ilang mga kinabuhi nga ilang giusikan.
Apan, tungod kay taas-taas pa man gihapon ang atong pagahisgutan mahitungod niining imong sitwasyon, tugoti na usab ako nga ato kini nga padayunon pagtuki sa mga sunod nga edisyon niining atong patik. Hangtud na usab sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinicalsexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)