MATOD pa’s mga tawo nga sagad natong mahinabi kanunay makontrobersiyal ang tanang mga lakang nga gihimo sa atong Presidente Rodrigo Roa Duterte, ang halok sa usa ka minyo nga Pilipina niadtong pagduaw niya sa South Korea diin nakaani og daghang mga pagsaway.
Dinhi nagbugno ang mga nagkadaiyang mga opinyon kontra o pabor, apan sa katapusan nawala ra ang maong isyu sa dihang misulti mismo ang babaye nga nahalokan sa atong presidente nga walay malisya tungod kay nananghid ang presidente, ug kini atubangan sa publiko ug dili sekreto tungod kay ang iyang bana dili man gani argabyado.
Karon, laing kontrobersiya na usab nga halos nakapakurat sa tanang mga katawhan sa tibuok kalibutan sa dihang ginganlan niya ang Dios og estupido, pero ang pangutana kang kinsang Dios ang iyang gitomong nga estupido? Dinhi nato karon tukion pag-ayo.
Kong ikaw ang pangutan-on, pila man diay kabuok ang Dio? Kon magyagayaga ka moingon ka daghan, pero seryuso ta ining puntoha, kadaghanan moingon gyud nga ang tinuod nga Dios mao gyud daw ang iyang gibalikas, tungod kay naghisgut man siya kang Adan ug Eva, ang unang tawo nga gibuhat sa Dios, segon sa mabasa nato Genesis ang unang libro sa atong Balaang kasulatan.
Matod pa sa atong presidente gibuhat niya ang tawo nga perpekto, apan tungod sa mga tentasyon sa serepente o yawa iya kining giguba, pero, wala magngalan ang presidente kon kinsay ngalan sa Dios nga iyang ginganlan og estupido. Ingon ini ang iyang pagkasulti: “your God is stupid, but my God is perfect,” ambot lang kay bisan ako maglibog og kinsa gyud nga Dios ang iyang ginganlan og "stupid", Si Yahweh, El Shaddai, Yabahsuwah, Jesus Christ o uban pang mga pangalan nga mabasa nato diha sa balaang kasulatan.
Para sa relihiyong katoliko ug mga evangelical Church sa Pilipinas, dili ninyo dapat pugson ang presidente nga mangayo og pasaylo, kay kon sa pagtuo ninyo nga nakasala si Presidente Duterte sa iyang pagpanamastamas sa Dios, dili ninyo kini sala? Iya kining sala ug siya ang manubag niini ngadto sa buhi nga Dios ug dili sa inyo?
Maayo kaayo tang mamantay kay ngano, kamong mga Obispo, Pari, Pastor, Ministro sigurado ba gyud mo nga hinlo ug walay sala? Lucas kapitulo 6: bersukulo 37 nagkanayon: "Ayaw kamo paghukom sa inyong isigkatawo, ug ang Dios dili kamo hukman."
Ang ato bayang kaluwasan indibiduwal, ang pagtuo sa Dios personal nimo na, kon diha ka nagtuo nga maluwas ka, tungod kay walay relihiyon nga makaluwas kon dili ang imong hugot nga pagtuo sa Dios, uban sa buhat kay ang pagtuo nga walay binuhatan - patay.
Ang gisulti ni Presidente Duterte personal niya nga pagtuo ug personal niya nga panglantaw mao nga iya ra ka na ug wa kita’y labot. Sa mga founders sa tanang mga relihiyon, ayaw mo pagpakalimpyo kay sa tinuod lang, gigamit ninyo ang pangalan sa Dios alang sa iyong pagpadato, kana ang tinuod ug dili ikalimod.
Ang paghukom sa Dios sa iyang pagbalik, walay gipili kay wa mag-ingon
nga wa’y labot ang Santo Papa, Obispo, Pari, Madre, Pastor ug Ministro. Kay ang ikaduhang Corinto kapitulo 5: bersikulo 10 nag-ingon, "Kay kinahanglan moatubang kitang tanan kang Kristo aron iyang hukman, aron ang tagsa-tagsa makadawat sa angay kaniya sumala sa iyang nabuhat, maayo o dautan dinhi sa kalibutan."
Tawo kalang, wala kanimo ang katungod sa paghukom kay kon pagpanamas-tamas ang iyang gihimo, siya ang manubag sa Dios, kay sa iyang pagka-presidente, wala siya makalabaw sa atong Dios.
+++
Mayorya supak sa ‘same-sex marriage’
Kadaghanan sa mga Filipino mibasura sa sugyot nga ilegalisa ang same-sex marriage sa nasud, suma sa Social Weather Stations (SWS) survey niadtong Marso ning tuiga.
Ang survey, gilusad niadtong Marso 23 ngadto 27, nasuta nga 61 porsyento misupak sa balaudnon nga magtugot sa civil union sa same-sex nga magpares sa Pilipinas, nga gidomina sa mga Katoliko nga nasud.
Naa lamang sa 22 porsyento ang misuporta sa same-sex marriage, samtang 16 porsyento ang di makahukom sa maong butang.
Ang resulta nagpaskin sa net score nga “very weak” -40, labot suporta sa publiko sa pagminyo sa lesbian, gay, bisexual, or transgender (LGBT) nga managpares.
Sa hisgutanan sa relihiyon, misupak sa pagminyo sa LGBT communities ang mga sakop sa Iglesia ni Cristo (“extremely weak” -64). Gisundan sa miyembro sa Kristiyanos nga (“extremely weak” -55), Muslims (“very weak” -48), ug Roman Catholic nga magtutuo (“very weak” +36).
Ang SWS nagsulti nga ang hugot nga misupak sa same-sex marriage gikan sa Visayas (“very weak” -45), gisundan sa Balance Luzon (“very weak” -42), Mindanao (“very weak” -38), ug Metro Manila (“moderately weak” -27).
Kon mao kini, wa man nato gikondena kining mga mga LGBT communities, apan maayo tingali nga hinuklogan sa mga magbabalaod ang pagpalabang niini sa balay balauranan sa Kongreso ug Senado.
Kay silang mga magbabalaod representante man sa katawhan, nan, angay silang maminaw sa mga tawo nga ilang girepresentahan.