LUYO nga pakyas ang Pilipinas sa pagdepensa sa overall title, apan ang Davao City gidayeg sa malampuson nga pag-host sa 19th Asean+ Age Group Chess Championships nga nahuman niadtong Hunyo 28 didto sa The Royal Mandaya Hotel.
Ang Pilipinas nakahakot og kinatibuk-ang 55 ka bulawang medalya, 45 plata ug 26 bronze medalya aron mabutang sa ikaduhang puwesto nga misunod sa 13-time overall champion Vietnam nga dunay 70 bulawan, 52 plata ug 30 bronze medalya.
Ang ikatulo mao ang Indonesia nga dunay tulo ka plata ug usa ka bronze nga gisundan sa Singapore nga tulo ka bronze medal ug Thailand may duha bronze ug India usa ka bronze medal.
Bisan ang nasud napildi sa Vietnam, si National Chess Federation of the Philippines (NCFP) regional director James Infiesto miingon nga ang Davao City nakakuha og respeto gikan sa mga langyaw tungod sa hugot nga seguridad nga gipatuman ug sa pagkabuotan sa mga Dabawenyo.
"They love Davao! From food to hotel to people to security and convenience," ni Infiesto, kinsa nagpasalamat sab sa Royal Mandaya Hotel sa kanindot sa serbisyo.
Gihulagway sab ni Infiesto ang walo ka adlaw nga pag-host sa internasyunal kompetisyon nga "A huge success."
Nagpasalamat ang NCFP regional director kang NCFP ubos ni president Prospero Pichay Jr., ASEAN Chess Confederation ubos ni founding chairman Ignatius Leong, Philippine Sports Commission ug lokal panggobyerno sa Davao sa pagsuporta sa torneyo.
"Special thanks to Davao City mayor Sara Duterte-Carpio, PSC commissioner Charles Maxey, Sports Development Division-City Mayors Office (SDD-CMO) OIC Michael Denton Aportadera, City Mayors Office (CMO) chief of staff attorney Raul Nadela Jr., GenRose Tecson of Davao City Tourism Office PSC office-in-charge Arnold Agustin, attorney Guillermo Iroy Jr., Grand Master (GM) Jayson Gonzales and Arnold Allanigui of Chess Events Internationale," ni Infiesto.
Gawas niini, nagpasalmat sab siya sa tanang partisipante, ginikanan, trainers, coaches ug Local Government Unit (LGU) heads.
Ang kalihukan gisuportahan sab sa Chess Events Internationale, Phoenix Petroleum, PAGCOR, Anflocor ug Jollibee.