TING-ULAN na gayud. Walay adlaw nga dili kita ulanon bisan kon sa makadiyot lamang. Bantayanan lang kay mao kini ang tinubdan sa pagdahili sa yuta, hinanaling pagbaha og trangkaso sa tawo.
Likayi ang pagsinghot sa inalisngaw sa dalan nga sagad natong masinatian kung mokalit ang ulan gikan sa naglagiting nga kainit sa adlaw. Maayong magdala og payong ug kaputi ilabi na sa gagmay’ng bata. Inom og daghang tubig og Vitamin C aron makalikay sa sakit.
Apan samtang ting-ulan na, diha pa nagdalidali og buhos og semento sa kadalanan ang pipila ka kontraktor.
Sa niaging mga bulan, hinay kaayo ang ilang trabaho tungod kuno sa kanihit sa balas og graba gikan sa quarry sa atong dakbayan.
Bisan sa build-build-build project sa administrasyon ni PRody Duterte, kulelat gihapon ang Davao sa pagpapaspas sa imprastraktura. Sa pakisusi, nahibaloan nga anaa pa sa proseso ang renewal sa sand and gravel (SAG) quarry permit ang kadaghanan sa mga “Quarrydors” o “permittee.” Anaa say mga bag-ong aplikante sa SAG nga maghulat sa approval sa ilang permit.
Alang sa wala masayod, ang proseso sa pagkuha’g permit sa SAG sa City Environment and Natural Resources (Cenro) dili basta-basta. Mora pud og nisulod ang camelo sa mata sa dagom sa kadaghan sa resikitos ug bayranan.
Gawas sa pagkuha’g Environment Compliance Certificate (ECC) sa Environment Management Bureau, moagi pa kini sa halos tanang ahensiya sa gobyerno ug mosangko didto sa komitiba sa Environment sa Sangguniang Panlungsod (SP).
Isa-isahon sa SP ang matag aplikasyon una pa hatagan og pagtugot nga makapalit og quarry ticket aron makasugod og pagbaligya og materyales sa mga kontratista. Sa milabay nga mga tuig, sayon ra ang pagkuha og permit.
Ang usa ka permittee pwede lamang makakuha og 10,000 cubic meters nga graba sa iyang usa ka ektarya nga quarry. Kasagaran moabot og sobra tuig ang pagproseso sa permit nga gikasaway sa kadaghanan.
Dili tinuod ang ginasulti nga sayon mokuhag permit sa pagnegosyo sa Davao. Nagminghoy karon ang mga “Quarrydors” ug mga aplikante kay hastang dugaya nga natanggong ang ilang papeles. Kung si Konsehal Danny Dayanghirang pa ang pasultihon, dali ra kining aprubahan sa SP kay wala may lalis nga nagkinahanglan ang syudad og SAG isip suporta sa build-build-build project sa pangulo.
Sakop si Konsehal Dayanghirang sa komitiba sa Environment Management Committee sa syudad nga mo-indurso sa mga aplikasyon ug renewal sa quarry. Apan sobra duha na ka bulan gikan sa ilang pag-meeting didto sa City Planning and Development Office, itom pa sa alkitran ang kapalaran sa ilang papeles.
Gikasaway usab kini sa mga kontratista, developers ug investors kay imbis ang Davao ang ilang gihandom nga sayon sa ilang negosyo kay lagi “Life is Here” unsa mang unsaa nga “Hardlife is Here” na man hinuon.
Unta lantawon kini sa mga sakop sa SP kay dili ingon niini ang gihandom nga kabag-ohan ubos sa pamunuan sa pangulo. Imbis nga ang Davao ang ehemplo sa maayong pagnegosyo, hapsay highway, kontra-droga ug kurapsyon, iwas-paputok ug sigarilyo, kini na man hinuon ang babag sa kalambuan sa imprastraktura.