ANG K-Pop o Korean pop “in” kaayo karon sa mga batan-on labi na sa mga babaye.
Sa Manila daghan nang K-pop group ang naka-concert sama sa “Super Junior” nga nag-concert niadto lang Biyernes sa Mall of Asia Arena.
Mao nga dunay Cebu-based production ang nipadayag karon sa ilang tinguha nga mopahigayon sad og K-Pop concert sa Cebu. Ang plano nilang kuhaon ang South Korean pop group sensation nga BTS. Sikat kaayo ning grupoha karon.
Nagpadayon ang ilang negosasyon sa management sa BTS nga nangayo kuno og talent fee nga P60 million!
Dunay 30 ka tawo ang entourage apil na ang crew ug staff sa BTS. Kon madayon man gani ni next year ang ilang target date!
Sheena
Nahurot akong bilib sa Cebuanang si Sheena Belarmino niadtong Dominggo nga maoy nidaug isip “KZ Tandingan” sa “Your Face Sounds Familiar Kids” sa ABS-CBN.
Dugay na kong bilib aning bataa sa Tawag ng Tanghalan pa lang. Karon nga gi-mentor siya sa mga banggiitan sa Manila, samot nigawas ang iyang potential.
Sa mga batan-ong babaye sa Cebu nga nakahimo karon og pangan sa Manila, no offense meant pero dako ang akong pagtuo nga mas layo og maabtan nila si Sheena.
Tubig queen
Wala na sad diay kapasar si Dodoy Teberio alyas “Tubig Queen” sa Teacher’s Licensure Board Exam.
Ikaduha na ni niyang take. Apan laban lang. Basin duna kunoy laing plano ang Ginoo niya.
Sa pagkakaron, padayon si Dodoy nga nag-teach ug nitabang sa iyang mama sa pagpamaligya og Tubiiiig!!!
Ironman
10 years ago kuhaon ra nako ang Jubay, Liloan to SunStar office sa P. del Rosario og usa ka oras nga mag-commute ra. Karon, bisan pa og 2 ka oras maglisud na tungod sa kadaghan nang sakyanan.
Sakto ang desisyon ni Liloan Mayor Christina Frasco nga dili mosugot sa kapritso sa Kapitolyo nga gusto pasirad-an ang national highway sa Liloan og 8 ka oras alang sa Ironman.
Asa man moagi ang mga taga-Norte nga wa may laing agianan? Kadaghang maperwisyo!
Sa unang panahon
Nalingaw ko sa gitug-an ni Miss Cristine sa HR department sa Sun.Star nga kato kunong nag-eskwela pa siya ug wala pa mauso ang internet, pangguntingon niya ang atong mga kanta ug mga litrato sa artista dinhi ug ibutang sa scrap book.
Dili ni unang higayon nga makasugat kog ingon aning estorya. Duna pa gani na-feature karong tuiga lang sa Balitang Bisdak sa GMA-7 nga nahimamat niya ang iyang kapikas pinaagi sa Dear AC. Bisan pa-showbiz showbiz ra ta pero daghan ang naka-relate, ha! Laysho!