ANG tibuok Mactan Circumferential Road, Lapu-Lapu City ug North Reclamation Area sa Mandaue City maoy bag-ong rota sa Ironman 70.3 Asia Pacific Championship nga ipahigayon sa Agosto 5.
Nasayran sa Superbalita Cebu nga ang organizer sa Ironman nakigtagbo ngadto ni Lapu-Lapu City Mayor Paz Radaza, Tourism head Hembler Mendoza ingon man ngadto sa OIC-chief sa City Traffic Management System Mario Napule aron sa pagpadangat sa ilang proposal sa pag-usab sa rota sa maong lumba.
Gitug-an ni Radaza nga mi-uyon siya sa kausaban sa rota sa Ironman sa dihang nakigtagbo kagahapon ang organizer didto sa iyang buhatan.
Matod pa sa mayor nga pabilin sa naandan ang swim course sa kadagatan sa Shangri-La’s Mactan Resort and Spa, apan mosubay na sa Mactan Circumferential Road alang sa bike race lahos na sa Mandaue City nga maoy gi-usab inay nga motadlas pa sa silingang dakbayan o lungsod.
Ang run course ipahigayon gihapon sa Barangay Punta Engaño, Lapu-Lapu City.
“So, kutob nalang siya sa Mandaue City,” dason ni Radaza.
Si Mendoza sa iyang bahin nipahibawo nga base sa inisyal nga nasabutan nga gamiton ang Mactan Circumferential Road nga manukad sa Shangri-La’s Mactan Resort and Spa, Barangay Punta Engaño, subay sa Mactan, Maribago, Marigondon, Basak , Pajo lahos na ngadto sa karaang taytayan paingon sa dakbayan sa Mandaue alang sa bike route.
Gikatahong mosubay sa F. E. Zuellig Avenue, North Reclamation Area sa Mandaue City sa dili pa mobalik sa agi (Lapu-Lapu) ug ang pag-kompleto sa three loops.
“Naay dedicated lane para nila (guest, riding public and motorista). Stop and go lang sa mga intersection,” tipik sa pamahayag ni Mendoza.
Dugang pa ni gikinahanglan nga adunay massive information drive kalabot sa traffic plan sa siyudad aron nga masayod ang publiko og molikay sa mga kalsada nga gamiton sa maong triathlon race.
Nagkanayon si Radaza nga dili ma-apektuhan ang dalan sa airport sanglit abli ang Marcelo Fernan Bridge. (FVQ)