Diputado: Papha kon masakpan matulog
DAKO ang katingala sa pipila ka opisyal kaniadtong Huwebes sa miaging semana sa dihang gisultian sila nga paunhon na lang sa Panglao kay walay panahon si PRRD nga makighinabi kanila sanglit gikan sa iyang gisakyan nga jet, moderetso lang kini og sakay sa helicopter paingon sa Bellevue Hotel sa Panglao.
Gusto unta sa maong mga opisyal nga makighimamat kang PRRD nga “sila sila” lang og walay kompetensiya didto mismo sa tarmac sa city airport.
Napakgang ang ilang plano kay “gipapahawa” man sila sa taga-PMS.
* * *
Buyno, dili sab sila angay masuko.
Panahon sa pre-arrival briefing nga gihimo sa PMS, gipahibalo na silang daan nga walay mga lokal nga mga opisyales ang mosugat ni PRRD sa city airport.
Nahibalo sila nga mga taga-PNP og taga-CENCOM lang ang mosugat ni PRRD apan bisan pa niini, nagpabaga lang gihapon sila og sugat.
Hilaw nga ngisi na lang ang ilang gihimo sa dihang gisultian sila nga paunhon na lang sa Panglao.
* * *
Dunay laing hinungdan nganong dili sila angay masuko.
Panahon sa kampanya sa 2016 presidential elections, kining maong mga opisyal didto dapig ni Mar Roxas sa Liberal Party og nagbula-bula lang ang baba sa pagbatikos ni PRRD.
Gihinganlan pa nila og berdugo si PRRD tungod sa gihimo niini sa Davao City panahon nga mayor pa siya didto.
Berdugo og babaero pa gyod.
Daghan pang di makao’g iro nga mga saway ngadto ni PRRD.
Nahibalo si PRRD niini og nasayod siya kinsa ang kusog og yawyaw batok kaniya sa una.
Dayag na lang nga dili gyod siya gusto makighimamat niining mga tawhana.
Ang mga tigbatikos niya sa una mao nay perteng kusoga na kaayo mokatawa karon sa mga jokes ni PPRD, kusog na mokumo sa kamot og kusog na kaayo modip-ig ni PRRD.
Himaya ang ilang paminaw kon makatapad ni PRRD og makuhaan og hulagway.
Mao kini hinungdan nga dako ang kasuko sa mga supporters ni PRRD sa dihang nakita nila kining maong mga opisyal nga dako na kaayo og ngisi samtang nagkumo sa ilang kamot tapad ni PRRD.
* * *
Init kaayo ang bayloay og mga pulong human mogawas sa baba ni PRRD ang “stupid god.”
Daghan ang natingala nganong nakasulti niini si PRRD. Gani, giayo-ayo siya og batikos ni Bro. Eddie Villanueva pinaagi sa pag-quote og pipila ka mga “verses” sa bibliya. Mihulga pa si Villanueva nga mangulo sa usa ka rally ang iyang grupo kon dili mangayo og pasaylo si PRRD.
Dali ra kaayo mibalos ang mga supporter ni PRRD.
Bibo ang bayloay, og nagaka-init ang mga pulong gibuhian.
Dunay pangutana.
Matingala pa ba kita sa mga pulong gibuhian ni PRRD?
Panahon sa kampanya, nasayod na kita og unsa ang iyang pagka-tawo, nasayod na kita nga prangka kaayo siya nga pagka-tawo, nasayod na kita nga bugoy-bugoy ang iyang sinultian og dili siya mahilig mosunod og protocol.
Buot ipasabot, walay gitago si PRRD bahin sa iyang pagka-tawo.
Bisan gani ang iyang “pang-chicks” wala man na niya gitago. Gani, wa’g tuo ang batikos kaniya panahon sa kampanya.
Apan unsay nahitabo?
Landslide nga kadaogan ni PRRD.
Napildi ang kandidato sa mga kaparian, bisan pa kon gikampanya nila kini panahon sa wali sa simbahan.
Unsay buot ipasabot niini?
Wala tumana sa mga botante ang wali sa mga kaparian og gipakita nila ang ilang dakong pagsalig kang PRRD.
* * *
Buyno, nahitabot usab kini panahon sa kampanya ni PNoy.
Sa akong nahibaw-an, gimaldisyon sa mga kaparian si PNoy tungod sa iyang pag-suporta sa Reproductive Health Bill kaniadto og didto mosuporta ang mga kaparian ni Gibo Teodoro.
Apan naparot si Gibo og midaog gyod si PNoy bisan gikampanyahan pa si Gibo sa mga kaparian.
Buot ipasabot, kaduha na kini mahitabo nga wala motuman ang kinabag-an nga katawhan sa mga wali sa kaparian.
* * *
Giklaro sa kapolisan sa rehiyon atol sa Regional Peace and Order Council (RPOC) meeting kagahapon nga ang gihimo ni PNP Chief Oscar Albayalde sa pagdisiplina sa mga kapolisan nga masakpan nga matulog samtang nag-duty ila usab nga gihimo dinhi sa Region 7.
Dunay directive niini ang PNP regional director ngadto sa mga hepe sa kapolisan sa mga lain-laing lugar nga ila kining buhaton sa ilang tagsa-tagsa ka mga lugar.
Gani, matod pa, duna na silay nasakpan dinhi sa Cebu.
Nindot kini.
Atong paaboton nga ibalita kini sa atong mga media kon kinsa gyod ang mga polis nga nagpabadlong.