GIPASIGARBO ni Mayor Tomas Osmeña ang iyang kalampusan sulod sa duha ka tuig nga iyang pagdumala sa Cebu City Government atol sa iyang ikatulong state of the city address (Soca) kagahapon didto sa hawanan sa konseho.
Gipahimug-atan ni Osmeña ang pagpublikar niya sa iyang pribadong numero nga iyang gihulagway nga dako og natabang sa kasamtangang administrasyon hilabi na sa pagpakigbatok sa ginadiling drugas.
Gianunsyo ni Osmeña nga sa duha ka tuig niyang pagdala sa Siyudad ug pagpakigtambayayong sa Cebu City Police Office, dul-an sa tunga sa bilyon ka pesos nga kantidad sa shabu ang nasakmit sa kapulisan ubos sa liderato ni Senior Superintendent Joel Doria, kinsa bag-ohay rang gibalhin sa Camp Crame.
“Because of Colonel Doria, Cebu City is now the best drug enforcement unit in the whole Philippines. Many of these because of the text messages that I received and Colonel Doria acted upon,” matod ni Osmeña sa iyang Soca.
Gipasalamatan niya ang mga tawo nga ni-text kaniya hilabi na si Mitch Roldan nga maoy nakapaabli sa Cebu City Public Library sulod sa 24 oras.
Gianunsyo usab niya ang US $100,000 nga gi-donate ni Minnie Osmeña para sa sports facility sa South Road Properties ug ang pag-angkon niya sa bayranan unya sa mga tag-iya og bag-ong motorsiklo nga madakpan sa Land Transportation Office (LTO) nga wa pay rehistro.
Ang Sinulog Festival nga gideklarar isip top 3 best festival sa Asya, ang pagtukod unya niya og Call Center City nga makapatrabaho og 100,000 ka mga kawani diin sila tugotan unya nga makakuha og master’s degree.
Ang pagsugod og trabaho sa mga utilities para sa color coded nila nga mga wire ug ang pagtangtang sa spaghetti wires nga gihulagway niyang samok sa panan-aw ug delikado sa publiko isip pagpangandam sa ika-500 ka tuig nga kasumaran sa pag-abot ni Ferdinand Magellan sa Sugbo.
Iyang tinguha ang pagbuhi sa P18 bilyones nga unsolicited proposal sa Robinson didto sa SRP sanglit alang sa kaayohan sa south district ug ang pagsugod na unya sa pagtrabaho sa mga single mother sa call center.
Nalipay ang mayor sa paglusad ni Doria sa 4,400 ka anti drug operation nga nisikop sa 6,975 ka suspek, kansang drugas nga nasakmit niabot og 11.4 ka kilo nga shabu.
Lain niyang gipasigarbo ang 52,000 ka mga tawo nga natabangan ug nahatagan og libreng tambal ubos sa long life program sa Siyudad ug ang kapin 8,000 ka mga pasyente nga natabangan sa Siyudad pinaagi sa P77 milyones nga pundos ubos hospitalization program.
Giangkon usab ni Osmeña nga nilambo na ang koleksyon sa basura sa tibuok dakbayan.
Reaksyon sa opposition
Si Konsehal Joel Garganera niingon nga “ his delivery is dry and achievements are dull” diin nilungtad ra og 13 minutos ug 30 segundos ang iyang Soca.
“Nangawat pa gyud og achievements ni Doria. He claimed to be instrumental in the fight against drugs because of the information he forwarded to Doria. These are all lies. You confirm it with Doria. Nahuman nalang siya sa iyang 2-year assignment, wala gihapon taga-i og sakyanan,” padayag ni Garganera.
Si Konsehal Raymond Garcia, sa iyang bahin, nakagusto sa ikatulong Soca sa mayor sanglit sa ikaduhang Soca niini, pulos pagpangataki sa iyang kontra sama pananglit ngadto kang kanhi mayor Michael Rama, kanhi mayor Alvin Garcia ug Garganera.
Apan karon, ang mayor, matod pa sa batan-ong Garcia, nakatutok sa iyang mga nahimo gikan sa labing gamay ngadto sa labing dako niyang programa ug proyekto.
Apan nasagmuyo siya sanglit wala niini hisgoti ang problema sa baha, trapiko ug problema sa basura nga padayon nga nasinati sa mga barangay. (PAC)